அறிந்த பழமொழிகளும், அறியாத அர்த்தங்களும்.. கழுதைக்குத் தெரியுமா??

- அ. சுபலட்சுமி

பழமொழி அதாவது Proverb என்பது மக்கள் தங்களது வாழ்வியல் அனுபவங்கள் மூலம் உணர்ந்த உண்மைகளை, தலைமுறை தலைமுறையாகச் சுருக்கமாகவும், தெளிவுடனும், அழகியலுடனும் கூறி வரும் பழமையான தொடர்களாகும்.

இது "பழமை + மொழி" எனப் பிரிந்து, "தொன்றுதொட்டுச் சொல்லப்பட்டு வரும் வார்த்தை" எனப் பொருள்படும். தொல்காப்பியம் பழமொழியை ‘முதுசொல்’ அல்லது ‘முதுமொழி’ என்று குறிப்பிடுகிறது.

அப்படிப்பட்ட பழமொழிகள் குறித்தும் அதன் உண்மையான அர்த்தம் குறித்தும் ஒரு தொடராக நமக்கு விளக்க வருகிறார் ஆசிரியர் அ. சுபலட்சுமி.

கழுதைக்கு தெரியுமா கற்பூர வாசனை - இதுதான் நமக்குத் தெரிந்த பழமொழி.

கழு தைக்க தெரியுமாம் கற்பூர வாசனை - இதுதான் உண்மையான பழமொழி

விளக்கம்

"கழு".. இது ஒரு வகை மருத்துவ குணம் கொண்ட கோரைப்புல் ஆகும்.

முன்னோர்கள் இப்புல்லைக் கொண்டு பாய் தைத்தனர். அந்தப் கோரைப் பாயில் படுக்கும்போது கற்பூரத்தைப் போன்ற நறுமணம் (வாசனை) வரும். பூச்சிகளும் அருகில் அண்டாது. 

"கழு தைக்கத் தெரியுமாம் கற்பூர வாசனை" என்ற சொற்றொடர்தான், காலப்போக்கில் மருவி "கழுதைக்குத் தெரியுமா கற்பூர வாசனை" என்று மாறிப் போய் விட்டது.

இதனால் அறிவில்லாதவர்களுக்கு நல்லதன் அருமை தெரியாது என்ற தவறான பொருளில் இன்று இது பயன்படுத்தப்படுகிறது. உண்மையில் இதற்கும் கழுதைக்கும் எந்தத் தொடர்பும் இல்லை.

இனிமேல் இதை சரியாக பயன்படுத்துவீங்க இல்லையா.. அடுத்த பழமொழியுடன் மீண்டும் சந்திக்கிறேன்.

(அ.சுபாலட்சுமி M.Sc,M.Ed, ஆசிரியர். பொழுதுபோக்கு: ஓவியம் வரைதல், கைவினை பொருட்கள் செய்தல்)