சிந்தனைச் சிதறல்.. எல்லா நேரங்களிலும் இருந்தும், அறியவும், அனுபவிக்கவும் மறுக்கும் அதிசயச்சொல்!

- அ. தாமஸ்

மகிழ்ச்சி, இது ஒரு மந்திரச் சொல். எல்லோரிடமும் எல்லா நேரங்களிலும் இருந்தும், நாம் அறியவும்,  அனுபவிக்கவும் மறுக்கும் அதிசயச்சொல். 

வெளியில் சிரிப்பதல்ல மகிழ்ச்சி, விழிகள் அழுதாலும் உள்ளம் சிரிக்கும் உயர்வே மகிழ்ச்சி. உள்ளம் சிரிக்கையில் கிடைத்திடும் உயர் நல் நிறைவே மகிழ்ச்சி.

பிறர் சிரிக்க சிரிப்பதல்ல மகிழ்ச்சி; பிறர் சிரிப்பில் நாம் சிரிப்பதும், பிற சிரித்திட நாம் சிரிப்பதுமே மகிழ்ச்சி. 

கவலை இல்லா  மனமே இல்லை. கவலை நிறைந்த மனதையும் கலங்கச் செய்யாமல் காத்து, எந்த ஒன்றையும் கடக்கும் வழிவகை கொடுக்கும் அதிசயமே மகிழ்ச்சி. 

மகிழ்ச்சி என்பது கிடைத்தற்கரிய அதிசயம் அல்ல, உள்ளம் நிறைந்து உதட்டில் கசிவது தான் மகிழ்ச்சி. மகிழ்ச்சி ஒன்றும் காசுக்குக் கிடைக்கும் கடைச் சரக்கல்ல; மனம் வைத்தால் மகிழ்ந்தே இருக்கலாம் என் நிலை வந்தாலும், அந்நிலை எவ்விளைவைத் தந்தாலும்.

(அ.தாமஸ் MSc, Bed, MPhil, MSc(psycho), Fscp(psycho), ஆசிரியர், வாணி கிராமம், சிவகங்கை மாவட்டம்)