அமெரிக்காவில் பயங்கர நிலநடுக்கம்... 6.2 ரிக்டர் அளவில் பதிவு

வாஷிங்டன் : அமெரிக்காவின் ஓரிகான் (Oregon) மாகாண கடற்கரைப் பகுதியில் சக்திவாய்ந்த நிலநடுக்கம் ஏற்பட்டுள்ளது. இது ரிக்டர் அளவுகோலில் 6.2 அலகுகளாகப் பதிவாகியுள்ளதாக ஜெர்மன் புவி அறிவியல் ஆய்வு மையம் (GFZ) தெரிவித்துள்ளது.

நேற்று இரவு (உள்ளூர் நேரம்) ஏற்பட்ட இந்த நிலநடுக்கம், ஓரிகான் மாகாணத்தின் பேண்டன் (Bandon) நகருக்கு மேற்கே சுமார் 295 கிலோமீட்டர் தொலைவில், பசிபிக் கடற்பகுதியில் மையம் கொண்டிருந்தது. இது கடலுக்கு அடியில் சுமார் 10 கிலோமீட்டர் ஆழத்தில் ஏற்பட்டதாக ஆய்வாளர்கள் தெரிவித்துள்ளனர். அமெரிக்க புவியியல் ஆய்வு மையம் (USGS) இந்த நிலநடுக்கம் 6.0 ரிக்டர் அளவில் இருந்ததாகக் குறிப்பிட்டுள்ளது.

நிலநடுக்கத்தின் அதிர்வுகள் ஓரிகான் மாகாணத்தின் கடலோரப் பகுதிகளில் லேசாக உணரப்பட்டன. நிலநடுக்கம் ஏற்பட்ட மையப்பகுதி கடலுக்குள் வெகுதொலைவில் இருந்ததால், நிலப்பரப்பில் பெரிய அளவிலான பாதிப்புகள் எதுவும் ஏற்படவில்லை. தற்போதைய நிலவரப்படி, உயிர்ச் சேதமோ அல்லது கட்டிடங்களுக்குப் பெரிய அளவிலான சேதமோ ஏற்பட்டதாகத் தகவல்கள் இல்லை. போர்ட்லேண்ட் போன்ற முக்கிய நகரங்களில் நிலைமை சீராக உள்ளதாக அதிகாரிகள் தெரிவித்துள்ளனர்.

நிலநடுக்கத்தைத் தொடர்ந்து சுனாமி ஏற்பட வாய்ப்புள்ளதா என்ற அச்சம் நிலவியது. இருப்பினும், அமெரிக்க நிலநடுக்கத் தகவல் மையம் மற்றும் பசிபிக் சுனாமி எச்சரிக்கை மையம் ஆகியவை, "தற்போதைய நிலவரப்படி சுனாமி எச்சரிக்கை ஏதும் விடுக்கப்படவில்லை" என்று உறுதிப்படுத்தியுள்ளன. கடலோரப் பகுதிகளில் வசிக்கும் மக்களுக்குப் பாதிப்பு ஏற்படாது என்று நிபுணர்கள் கணித்துள்ளனர்.

ஓரிகான் கடற்கரைப் பகுதி நிலநடுக்கங்கள் அதிகம் ஏற்படக்கூடிய மண்டலமாகும். கலிபோர்னியா முதல் கனடா வரை நீண்டுள்ள காஸ்கேடியா சப்டக்ஷன் மண்டலத்திற்கு (Cascadia Subduction Zone) அருகே இந்த நிலநடுக்கம் ஏற்பட்டுள்ளது. எனினும், இது பிரதான பிளவு மண்டலத்தில் ஏற்படாததால் பெரும் ஆபத்து தவிர்க்கப்பட்டதாக புவியியலாளர்கள் கருதுகின்றனர். அதிகாரிகள் தொடர்ந்து நிலைமையைக் கண்காணித்து வருகின்றனர். கடலோரப் பகுதி மக்கள் தேவையற்ற அச்சம் கொள்ள வேண்டாம் என்றும், அதிகாரப்பூர்வ தகவல்களைப் பின்பற்றுமாறும் அறிவுறுத்தப்பட்டுள்ளனர்.