சுதேசி மற்றும் சுயசார்பு.. முதன்மையான காந்திய சிந்தனைகளில் ஒன்று!

- அரசு, சமூக ஆர்வலர்

ஒரு நாட்டின் உண்மையான வளர்ச்சி என்பது பிற நாடுகளைச் சார்ந்திருப்பதில் இல்லை; மாறாக, தன் சொந்த வளங்களையும் மனித ஆற்றலையும் கொண்டு தன் தேவைகளைத் தானே பூர்த்தி செய்து கொள்வதிலேயே உள்ளது. இந்தத் தற்சார்புச் சிந்தனையின் மூலக்கல்லாக விளங்குபவை 'சுதேசி' மற்றும் 'சுயசார்பு' கொள்கைகளாகும். 

இந்திய விடுதலைப் போராட்டத்தின் போது பொருளாதார ஆயுதமாகத் தொடங்கிய இச்சிந்தனை, இன்று நவீன இந்தியாவின் முதன்மை வளர்ச்சிப் பாதையாக உருவெடுத்துள்ளது.

உள்நாட்டுப் பொருட்களைப் பயன்படுத்துவதும், கிராமங்கள் பொருளாதார ரீதியாகச் சுயசார்பு அடைவதும் நாட்டின் வளர்ச்சிக்குச் சான்றாகும் என்றார்  மகாத்மா காந்தி.

'சுதேசி' என்பது "சொந்த நாடு" அல்லது "நமது நாட்டுப் பொருட்கள்" என்று பொருள்படும். பிரிட்டிஷ் ஆட்சியின் போது இந்தியத் தொழில்களும் கைவினைஞர்களும் நசுக்கப்பட்டு, நாட்டின் செல்வம் வெளியேற்றப்பட்டதை எதிர்த்து சுதேசி இயக்கம் தோன்றியது.

மகாத்மா காந்தி சுதேசி இயக்கத்திற்குப் புதிய வடிவம் கொடுத்தார். வெளிநாட்டுத் துணிகளைப் புறக்கணித்து, இராட்டினத்தில் நூல் நூற்று கதர் ஆடைகளை அணியச் செய்தார். சுதேசி என்பது வெறும் பொருளாதாரக் கொள்கை மட்டுமல்ல, அது ஒரு தேசிய உணர்வு மற்றும் தன்னம்பிக்கையின் குறியீடு என்பதை காந்தியடிகள் உலகிற்கு உணர்த்தினார்.

சுயசார்பு என்பது பிற நாடுகளுடனான உறவைத் துண்டித்துக் கொள்வது அல்ல; மாறாக, அத்தியாவசியத் தேவைகளுக்கு பிறரை எதிர்பார்க்காமல் சொந்தக் காலில் நிற்பதாகும்.

சுதேசியும் சுயசார்பும் இந்தியாவின் இறையாண்மைக்கும் வளர்ச்சிக்கும் இரு கண்கள் போன்றவை. நாட்டின் ஒவ்வொரு குடிமகனும் உள்நாட்டுப் பொருட்களைப் பயன்படுத்துவதில் பெருமிதம் கொள்வதும், உள்ளூர் தொழில்களை ஆதரிப்பதும் மட்டுமே இந்தியாவை உலக அளவில் ஒரு வலுவான பொருளாதாரச் சக்தியாக மாற்றும்.