சிறைச்சாலை பாதுகாப்பில் கவன குறைவாக செயல்பட்டால்... முதல்வர் விஜய் போட்ட அதிரடி உத்தரவு

சென்னை:தமிழ்நாட்டில் உள்ள சிறைச்சாலைகளின் பாதுகாப்பை மேலும் வலுப்படுத்தவும், நவீன மாற்றங்களைக் கொண்டு வரவும் முன்னாள் டிஜிபி ஜே.கே. திரிபாதி தலைமையில் சிறப்பு உயர்மட்டக் குழு ஒன்றை அமைத்து முதலமைச்சர் விஜய் உத்தரவிட்டுள்ளார்.   

தமிழ்நாட்டிலுள்ள சிறைச்சாலைகளில் பாதுகாப்பை உறுதியாக்குவது மிக அவசியமான ஒன்றாகும். இந்தச் சூழலில், மாநிலத்தின் சிறை பாதுகாப்பை போர்க்கால அடிப்படையில் பலப்படுத்த வேண்டும் என்று முதலமைச்சர் விஜய் அறிவுறுத்தியுள்ளார். சிறைத்துறையில் ஏதேனும் அசம்பாவிதங்கள் அல்லது பாதுகாப்பு குறைபாடுகள் ஏற்படுவதைத் தடுக்கும் வகையில் இந்த உயர்மட்டக் குழு விரைந்து செயல்படும்.   

முன்னாள் டிஜிபி ஜே.கே. திரிபாதி தலைமையிலான இந்தக் குழுவில், சிறைத்துறை இயக்குநரான ஏடிஜிபி சங்கர் மற்றும் சிறைத்துறை முன்னாள் டிஜி ராஜேந்திரன் ஆகியோர் முக்கிய உறுப்பினர்களாக நியமிக்கப்பட்டுள்ளனர். இக்குழுவானது தமிழக சிறைச்சாலைகளில் பாதுகாப்பு அம்சங்களை மேம்படுத்துவதற்கான முக்கிய பரிந்துரைகளை அரசிற்கு வழங்கும். வெளிநாட்டுச் சிறைச்சாலைகளில் பின்பற்றப்படும் சிறந்த நடைமுறைகள், நவீன தொழில்நுட்ப பாதுகாப்பு அம்சங்கள் மற்றும் கண்காணிப்பு முறைகள் குறித்து விரிவாக ஆராய்ந்து அறிக்கை அளிக்கும்.   

சிறைத்துறை நிர்வாகம் மற்றும் பாதுகாப்பில் சற்றும் தொய்வு இருக்கக் கூடாது என எச்சரித்துள்ள முதலமைச்சர் விஜய், பணிகளில் கவனக்குறைவாகச் செயல்படும் எந்தவொரு அலுவலராக இருந்தாலும் அவர்கள் மீது மிகக் கடுமையான நடவடிக்கைகள் எடுக்கப்படும் என்றும் உறுதியாகத் தெரிவித்துள்ளார்.   சர்வதேச அளவிலான சிறந்த சிறை நிர்வாக நடைமுறைகளை அடிப்படையாகக் கொண்டு, இக்குழு அளிக்கும் அறிக்கையின் மூலம் தமிழக சிறைத்துறை விரைவில் புதுப்பொலிவும் உயர்மட்டப் பாதுகாப்பும் பெறும் என எதிர்பார்க்கப்படுகிறது.