அக்கா – என் வாழ்வின் இன்னொரு தாய்.. ரம்யாவின் கவிதைத் தோட்டம் (15)
- கவிஞர் மு. ரம்யா ஆனந்த்
அம்மாவின் கருவறை தந்த உறவு,
அன்பால் இதயத்தில் பதிந்த உறவு!
என் வாழ்வில் நான் பெற்ற வரம்,
என் அக்கா… நீயே என் பலம்!
சின்ன வயதில் சண்டைகள் போட்டோம்,
சில நேரம் பேசாமல் வாடினோம்!
ஆனால் என் கண்ணில் கண்ணீர் வந்தால்,
உன் கண்களிலும் மழை பொழிந்ததே!
நான் கேட்காமலே என் மனம் அறிந்து,
என் தேவைகளை உணர்ந்தவள் நீ!
என் மகிழ்ச்சிக்காக உன் ஆசை மறந்து,
எனக்காகவே வாழ்ந்தவள் நீ!
அம்மா திட்டினால் ஆறுதல் சொல்வாய்,
அப்பா கோபித்தால் அணைத்துக் கொள்வாய்!
உலகமே என்னை எதிர்த்தாலும்,
என் பக்கம் நிற்கும் உறவாய் இருப்பாய்!
என் சிரிப்புக்குப் பின்னால் நீ இருப்பாய்,
என் கண்ணீருக்குள் உன் அன்பு இருக்கும்!
நான் தடுமாறும் ஒவ்வொரு நொடியும்,
என் பாதைக்கு வெளிச்சமாய் இருப்பாய்!
காலம் நம்மை வளர்த்துவிட்டது,
கடமைகள் நம்மைப் பிரித்துவிட்டது!
ஆனாலும் உன் மடியில் சாய்ந்த அந்த நாட்கள்,
என் மனதை விட்டு மறையவில்லை!
நமக்கென்று தனித்தனி வாழ்க்கை வந்தாலும்,
நம் பாசத்திற்கு எல்லைகள் ஏது?
உன் வீட்டில் நீ ராணியாக இருந்தாலும்,
என் மனதில் நீ என்றும் என் அக்காதானே!
என் குழந்தைகளின் சிரிப்பைக் காணும்போது,
உன் முகத்தில் மகிழ்ச்சி மலர்வதைப் பார்ப்பேன்!
என் வாழ்க்கை நன்றாக இருக்க வேண்டும் என்று,
மனதிற்குள் வேண்டிடும் உன் அன்பை உணர்வேன்!
அக்கா…
சில உறவுகள் பிறப்பால் கிடைக்கும்,
சில உறவுகள் பழக்கத்தால் நிலைக்கும்!
ஆனால் உன்னைப் போன்ற ஓர் உறவு,
ஒரு பிறவியில் கிடைத்த பெரும் தவம்!
நான் சொல்ல மறந்த நன்றிகளும்,
உன்னிடம் பகிராத உணர்வுகளும்,
என் இதயத்தின் ஓரத்தில் உறங்குகின்றன…
உன்னை நினைக்கும் ஒவ்வொரு முறையும்
அவை கண்ணீராய் விழிக்கின்றன!
மறுஜென்மம் என்று ஒன்று இருந்தால்,
மீண்டும் உன் தங்கையாகப் பிறக்க வேண்டும்!
இந்தப் பிறவியில் சொல்லாத அன்பையெல்லாம்,
அடுத்த பிறவியில் சொல்லித் தீர்க்க வேண்டும்!
அக்கா…
அம்மாவுக்குப் பிறகு என்னை அணைக்கும் கரம் நீ!
அப்பாவுக்குப் பிறகு என்னைக் காக்கும் உறவு நீ!
உலகம் முழுவதும் தேடினாலும் கிடைக்காத
என் வாழ்வின் பொக்கிஷம் நீ!
உன் அன்பை எழுத வார்த்தைகள் போதாது…
உன் தியாகத்தைச் சொல்ல வரிகள் போதாது…
நீ என் அக்காவாகக் கிடைத்தது
என் வாழ்க்கை செய்த புண்ணியம்!
என்றும் உன் தங்கையாக…
உன் அன்பில் வாழும் ஒரு குழந்தையாக…
உன்னை நேசித்துக் கொண்டே இருப்பேன்!
(கவிஞர் மு. ரம்யா ஆனந்த், D.T.Ed., M.A., M.Ed. கல்வித் தகுதிகளைப் பெற்றவர். கல்வித்துறையில் ஆர்வம் கொண்டவர். ஆசிரியர் பணிக்கான போட்டித் தேர்வுகளுக்குத் தயாராகி வருவதுடன், பெண்களின் உணர்வுகள், வாழ்க்கை அனுபவங்கள், தன்னம்பிக்கை மற்றும் மனித உறவுகளை மையமாகக் கொண்டு கவிதைகள் எழுதுவதிலும் ஆர்வம் கொண்டவர். தனது எழுத்துகளின் மூலம் வாசகர்களின் மனதில் நல்ல சிந்தனைகளையும் நம்பிக்கையையும் விதைப்பதை விரும்புகிறார்)