மணக்கமணக்க சாப்பிடலாம்.. மதுரையில் பிரம்மாண்ட உணவுத் திருவிழா 2025.. சுவைக்க வாங்க!

மதுரை: உணவுப் பிரியர்களின் சொர்க்க பூமியான மதுரையில், மாநகராட்சி சார்பில் பிரம்மாண்டமான உணவுத் திருவிழா ஒன்றுக்கு ஏற்பாடு செய்யப்பட்டுள்ளது. 

மூன்று நாள் நிகழ்வு, சுவைப்பிரியர்களை மகிழ்விப்பதோடு, தமிழகத்தின் பாரம்பரிய கலைகளையும் பறைசாற்றும் வகையில் அமைய உள்ளது.

இந்த உணவுத் திருவிழா, ஜூலை 11ஆம் தேதி அதாவது இன்று தொடங்கி, ஜூலை 13ஆம் தேதி வரை மூன்று நாட்களுக்கு நடைபெறவுள்ளது. மதுரை தமுக்கம் மைதானத்தில் உள்ள அறிவுசார் மையம் அருகிலுள்ள மாநகராட்சி வாகனக் காப்பகத்தில் இந்த விழா கோலாகலமாக நடைபெறவுள்ளது.

காலை முதல் இரவு வரை நடைபெறும் இந்தத் திருவிழாவிற்கு நுழைவு இலவசம் என்பதால், அனைவரும் குடும்பத்துடன் பங்கேற்று மகிழலாம்.

உணவுத் திருவிழா என்றாலே விதவிதமான உணவு வகைகள்தான் நினைவுக்கு வரும். அந்த வகையில், மதுரையில் நடைபெறும் இந்தத் திருவிழாவில், தமிழகத்தின் பல்வேறு பகுதிகளைச் சேர்ந்த பாரம்பரிய உணவு வகைகளும், நவீன உணவுகளும் ஒரே குடையின் கீழ் சங்கமிக்கவுள்ளன. காரசாரமான மதுரை உணவுகள் முதல், இனிப்பு வகைகள், தின்பண்டங்கள் எனப் பலவிதமான சுவைகளை ஒரே இடத்தில் அனுபவிக்கலாம்.

உணவுகளோடு நின்றுவிடாமல், தினந்தோறும் பாரம்பரிய நாட்டுப்புற கலை நிகழ்ச்சிகளுக்கும் இந்தத் திருவிழாவில் ஏற்பாடு செய்யப்பட்டுள்ளது. கரகாட்டம், ஒயிலாட்டம், தப்பாட்டம், சிலம்பாட்டம் போன்ற தமிழகத்தின் பழைமையான கலை வடிவங்களை, உணவுகளைச் சுவைத்தபடியே கண்டு களிக்கலாம். இது, விழாவிற்கு வரும் மக்களுக்கு உணவு மற்றும் கலை என இரட்டை விருந்தாக அமையும்.

மதுரையின் பெருமை:

மதுரை, தமிழ்நாட்டின் கலாச்சார மற்றும் வரலாற்றுச் செழுமைக்குப் பெயர் பெற்றது. இந்த உணவுத் திருவிழா, மதுரையின் சமையல் பாரம்பரியத்தையும், கலைப் பண்பாட்டையும் பறைசாற்றும் ஒரு தளமாக அமையும். உள்ளூர் வியாபாரிகள், சிறு தொழில்முனைவோர் மற்றும் சமையல்கலைஞர்களுக்கு இது ஒரு சிறந்த வாய்ப்பாக இருக்கும்.

இந்த உணவுத் திருவிழா குறித்து மதுரை மாநகராட்சி ஆணையர் கூறுகையில், "மதுரை மக்களின் நீண்ட நாள் எதிர்பார்ப்பான இந்த உணவுத் திருவிழாவை நடத்துவதில் பெருமை கொள்கிறோம். இது வெறும் உணவுக்கான விழா மட்டுமல்ல, நமது பாரம்பரிய கலைகளையும், கலாச்சாரத்தையும் வெளிப்படுத்தும் ஒரு நிகழ்வு. அனைவரும் வருகை தந்து, திருவிழாவைச் சிறப்பிக்குமாறு கேட்டுக்கொள்கிறோம்" என்று தெரிவித்தார்.

மதுரை மற்றும் சுற்றியுள்ள பகுதிகளைச் சேர்ந்த பொதுமக்கள் மட்டுமின்றி, சுற்றுலாப் பயணிகளும் இந்த உணவுத் திருவிழாவில் பங்கேற்று, தமிழ்நாட்டின் பாரம்பரிய சுவைகளையும் கலைகளையும் அனுபவிக்க ஆவலுடன் உள்ளனர்.