மதுரை மீனாட்சி அம்மன் கோவில் மஹா கும்பாபிஷேகம் 2026: லட்சக்கணக்கான பக்தர்கள் பங்கேற்பு!

மதுரை: உலகப் புகழ்பெற்ற மதுரை மீனாட்சி சுந்தரேஸ்வரர் திருக்கோவில் மஹா கும்பாபிஷேகப் பெருவிழா இன்று மிக விமரிசையாகவும், சாஸ்திர சம்பிரதாயங்களின் படியும் இனிதே நிறைவுற்றது. 17 ஆண்டுகளுக்குப் பிறகு நடைபெற்ற இந்தத் திருக்குடமுழுக்கு விழாவைக் காண்பதற்காகத் தமிழகத்தின் பல்வேறு மாவட்டங்களிலிருந்தும், இந்தியாவின் பிற மாநிலங்களிலிருந்தும், வெளிநாடுகளிலிருந்தும் லட்சக்கணக்கான பக்தர்கள் மதுரையில் குவிந்தனர்.

கடந்த 2009-ஆம் ஆண்டிற்குப் பிறகு, சுமார் 17 ஆண்டுகள் கழித்து இன்று கும்பாபிஷேகம் நடைபெற்றது.ஆகம விதிகளின்படி 12 ஆண்டுகளுக்கு ஒருமுறை கும்பாபிஷேகம் நடத்தப்பட வேண்டும் என்றாலும், கடந்த 2018-ஆம் ஆண்டு கோவிலின் வீர வசந்தராய மண்டபத்தில் ஏற்பட்ட தீ விபத்து காரணமாகவும், அதனைத் தொடர்ந்து மேற்கொள்ளப்பட்ட சிக்கலான தொல்லியல் சீரமைப்புப் பணிகள் காரணமாகவும் இத்திருவிழா தாமதமானது.

யாகசாலை பூஜைகள் மற்றும் திருப்பணிகள் : 

கும்பாபிஷேகத்தை முன்னிட்டு, கோவில் ராஜகோபுரங்கள், விளிம்புச் சிற்பங்கள், தங்க விமானம் ஆகியவை பல கோடி ரூபாய் செலவில் சீரமைக்கப்பட்டு, வண்ணம் தீட்டப்பட்டு பொலிவூட்டப்பட்டன. செப்டம்பர் முதல் வாரத்தில் இருந்து நாட்களாக 84 யாக குண்டங்கள் அமைக்கப்பட்டு, வேத விற்பன்னர்கள் மற்றும் சிவாச்சாரியார்களின் மந்திர முழக்கங்களுடன் எட்டு கால யாகசாலை பூஜைகள் சிறப்பாக நடைபெற்று வந்தன. கங்கட, யமுனை உள்ளிட்ட 7 புண்ணிய நதிகளிலிருந்து சேகரிக்கப்பட்ட புனித நீர் அடங்கிய கலசங்களுக்குத் தொடர் பூஜைகள் செய்யப்பட்டன.

புனித நீர் தெளிப்பும் கும்பாபிஷேகமும் :

இன்று காலை சுபமுகூர்த்த வேலையில், யாகசாலையிலிருந்து மங்கள வாத்தியங்கள் முழங்க புனித நீர் கலசங்கள் புறப்பாடாகி ராஜகோபுரங்கள் மற்றும் விமானங்களின் உச்சியை அடைந்தன. சரியாகக் குறிக்கப்பட்ட நன்நேரத்தில், சிவாச்சாரியார்கள் வேத மந்திரங்கள் முழங்க, ஹெலிகாப்டர் மூலம் மலர்கள் தூவ, ராஜகோபுர தங்கக் கலசங்கள் மீது புனித நீர் ஊற்றப்பட்டு மஹா கும்பாபிஷேகம் வெகு விமர்சையாக நடைபெற்றது. அப்போது கோவில் வளாகத்தைச் சுற்றிலும் திரண்டிருந்த பக்தர்கள் "அரோகரா" மற்றும் "மீனாட்சி சொக்கநாதா" என்ற பக்தி கோஷங்களை எழுப்பிச் பரவசமடைந்தனர்.

சிறப்பு ஏற்பாடுகள் மற்றும் பாதுகாப்பு :

விழாவை முன்னிட்டு மதுரை நகரம் முழுவதும் விழாக்கோலம் பூண்டிருந்தது. பக்தர்கள் சிரமமின்றி தரிசனம் செய்ய ஏதுவாகப் பல்வேறு இடங்களில் பிரம்மாண்ட எல்.இ.டி (LED) திரைகள் அமைக்கப்பட்டிருந்தன. கேசரி, வடை உள்ளிட்ட அன்னதானங்களும், குடிநீர் வசதிகளும் கோவில் நிர்வாகம் மற்றும் சமூக ஆர்வலர்கள் சார்பில் தாராளமாக வழங்கப்பட்டன. ஆயிரக்கணக்கான காவலர்கள் பாதுகாப்புப் பணியில் ஈடுபடுத்தப்பட்டு, ட்ரோன் கேமராக்கள் மூலம் கூட்ட நெரிசல் தீவிரமாகக் கண்காணிக்கப்பட்டது. மாலை வேளையில் மீனாட்சி அம்மன் - சொக்கநாதர் திருக்கல்யாணக் கோலத்தில் சிறப்புப் பிரகார உலா வந்து பக்தர்களுக்கு அருள்பாலிக்கவுள்ளனர்.