உழவின் மகுடம் - தைப்பொங்கல்!

உழவின் மகுடம் - தைப்பொங்கல்

மண்ணின் வாசம்:

கருக்கல் பொழுதில் விழித்தெழுந்து

கலப்பை பிடிக்கும் உழவன் முகம்;

கார்மேகம் தந்த கொடையினால்

கதிர் முற்றி நிற்குதே வயல்வெளி!

மண்ணை முத்தமிடும் செங்கதிர்கள்

மங்கலத் தையினை வரவேற்க - இன்று

பொன்னிறக் காட்சியாய் பூமிப்பந்து

புன்னகை பூத்து நிற்கிறதே!

முற்றத்துத் திருவிழா:

பசுஞ்சாணம் தெளித்த வாசலிலே

பச்சை இலைகளின் தோரணங்கள்!

வெண்மாவை இழைத்துக் கோலமிட்டு

வேடிக்கை பார்க்குது சிறுவர் கூட்டம்;

புதுப்பானை கழுத்தில் மஞ்சள் கட்டி

புதிய அரிசியைப் போட்டு வைத்து - நாம்

'பொங்கலோ பொங்கல்' என முழங்க

பொங்கி வழியுது பால் வெள்ளம்!

இனிக்கும் வாழ்க்கை:

வெல்லமும் நெய்யும் கலந்திருக்க - நம்

உள்ளமும் அன்பால் நிறைந்திருக்க;

கணுக்கணுவாய் இனிக்கும் கரும்பு போல

காலங்கள் யாவும் இனிமையாகட்டும்!

மஞ்சள் குலைகளின் மணம் பரவ

மாண்புறும் தமிழரின் அறம் வளர - இந்தத்

தைமகள் வரவில் தளைகளற்று

தனிப்பெரு வாழ்வு மலரட்டும்!

உழவுக்கும் தொழிலுக்கும் வந்தனை:

பகலவன் தந்த ஒளியினுக்கு - இங்கே

படைத்து நிற்போம் நன்றியினை!

உழைக்கும் கரங்கள் உயரட்டும்

உணவுப் பஞ்சம் நீங்கட்டும்!

ஏர் பிடிக்கும் கை - உலகுக்கு

உயிர் கொடுக்கும் மூலதனம்!

அந்த உழவனைப் போற்றி மகிழ்ந்திடவே

அவதரித்தது இந்தத் திருநாள்!

தை பிறந்தால் வழி பிறக்கும் - நம்

வாழ்வில் புது ஒளி பிறக்கும்!

(ந.மகாலட்சுமி, ஆசிரியர், கவிஞர், எழுத்தாளர். இலக்கியத் துறையில் 50க்கும் மேற்பட்ட விருதுகள், பாராட்டுகள், பரிசுகளைப் பெற்றுள்ளார். பணியாற்றுவது, பூவிருந்தவல்லி, திருவள்ளூர் மாவட்டம்)