காங்கிரஸ், பாஜக, திமுக - நாடாளுமன்றத்தில் தனித்தனியாக போராட்டம்

புதுடெல்லி: நாடாளுமன்ற வளாகத்தில் ஆளும் பாஜக கூட்டணி மற்றும் எதிர்க்கட்சிகளின் 'இந்தியா' கூட்டணி நாடாளுமன்ற உறுப்பினர்கள் (எம்.பி.க்கள்) நேருக்கு நேர் திரண்டு போட்டிப் போராட்டத்தில் ஈடுபட்டதால் பெரும் பரபரப்பு ஏற்பட்டது. இந்தியா கூட்டணி எம்.பி.,க்களுடன் சேராமல் திமுக எம்.பி.,க்கள் ஒரு புறம் தனியாக போராட்டத்தில் ஈடுபட்டது இந்த பதற்றத்தை அதிகரிக்க செய்துள்ளது.

எதிர்க்கட்சிகள் போராட்டம் :

நீட் தேர்வு முறைகேடுகள் மற்றும் தேர்வுத் தாள் கசிவு விவகாரங்களை முன்வைத்து, தொடர்ந்து 4வது நாளாக இன்றும் எதிர்க்கட்சிகள் நாடாளுமன்றத்தின் இரு அவைகளிலும் அமளியில் ஈடுபட்டனர். இதைத் தொடர்ந்து எதிர்க்கட்சி எம்.பி.க்கள் நாடாளுமன்ற வளாகத்தில் தீவிர போராட்டத்தில் ஈடுபட்டனர். இத்தேர்வு முறைகேடுகளுக்குப் பொறுப்பேற்று மத்திய கல்வி அமைச்சர் தர்மேந்திர பிரதான் உடனடியாகத் தனது பதவியை ராஜினாமா செய்ய வேண்டும் என எதிர்க்கட்சியினர் வலியுறுத்தினர்.

இந்த போராட்டத்தில் காங்கிரஸ் மூத்த தலைவரும் எம்பியுமான சோனியா காந்தி, காங்கிரஸ் தலைவர்கள் மற்றும் கூட்டணிக் கட்சி உறுப்பினர்கள் பலர் கலந்து கொண்டு அரசுக்கு எதிராக முழக்கங்களை எழுப்பினர். 'PAPER LEAK' மற்றும் 'PRADHAN RESIGN' போன்ற வாசகங்கள் அடங்கிய பதாகைகளை கைகளில் ஏந்தியவாறு அவர்கள் தங்கள் எதிர்ப்பைப் பதிவிட்டனர்.

பாஜக கூட்டணி பதிலடிப் போராட்டம் : 

எதிர்க்கட்சிகளின் இந்த போராட்டத்திற்குப் போட்டியாக, ஆளும் பாஜக தலைமையிலான தேசிய ஜனநாயகக் கூட்டணி (NDA) எம்.பி.க்களும் அதே வளாகத்தில் எதிரெதிரே திரண்டு போராட்டத்தில் ஈடுபட்டனர்.  எதிர்க்கட்சிகள் மாணவர்களின் எதிர்காலத்தையும், அவர்கள் சந்திக்கும் பிரச்சனைகளையும் சுயநல அரசியலுக்காகப் பயன்படுத்துவதாக பாஜக கூட்டணி எம்.பி.க்கள் குற்றம்சாட்டினர். "மாணவர்கள் போராட்டத்தை அரசியலாக்காதே" என்ற தொனியில் முழக்கங்களை எழுப்பிய ஆளும் தரப்பு எம்.பி.க்கள், எதிர்க்கட்சிகளின் அணுகுமுறைக்குக் கடும் கண்டனம் தெரிவித்தனர்.

திமுக தனித்து போராட்டம் :

தமிழகத்தில் காங்கிரஸ் உடனான கூட்டணியை முறித்துக் கொண்டதால் டில்லியில், இந்தியா கூட்டணியுடன் சேராமல் தனியாக திமுக எம்.பி.,க்கள் நீட் விவகாரம் தொடர்பாக போராட்டம் நடத்தினர். ஏற்கனவே நாடாளுமன்றத்தில் காங்கிரசிற்கு அருகில் இல்லாமல் தனியாக வேறு பக்கம் தங்களுக்கு இடம் ஒதுக்கி தர வேண்டும் என திமுக சார்பில் கேட்கப்பட்டிருந்தது. இப்போது போராட்டத்திலும் திமுக தனித்து நின்று குரல் கொடுத்து வருவது அரசியல் வட்டாரத்தில் பதற்றத்தை அதிகரித்துள்ளது.

சலசலப்பில் நாடாளுமன்ற வளாகம்

நாடாளுமன்றத்தின் இரு அவைகளும் கூடுவதற்கு முன்பாக, வளாகத்திற்குள் இருமுனைத் தலைவர்களும் ஒரே நேரத்தில் திரண்டு எதிரெதிரே முழக்கமிட்ட சம்பவம் டெல்லி அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.  நீட் தேர்வு விவகாரம், வினாத்தாள் கசிவு புகார்கள் குறித்து விரிவாக விவாதம் நடத்த தயார் என மத்திய அரசு ஏற்கனவே அறிவித்து விட்டதால், விவாதங்கள் நாடாளுமன்றக் கூட்டத்தொடரிலும் எதிரொலிக்கும் என்பதால், வரும் நாட்களில் இரு தரப்பிற்கும் இடையேயான காரசாரமான விவாதங்கள் மேலும் சூட பிடிக்கும் என எதிர்பார்க்கப்படுகிறது.