தேர்வு.. ஒரு நிமிடக் கதை (35)

- பூரணவள்ளி சேகர்

கார்த்திகேயன்  தேர்விற்கு தயாராகிக் கொண்டிருந்தான். தனக்குத் தெரியாத மேலும் சந்தேகமாக இருக்கும் பாடப் பகுதிகளை  கண்ணனிடம் கேட்டுத் தெளிந்தான். கண்ணன் நன்கு படிப்பவன். ஆதலால் கார்த்திக்கின் சந்தேகங்களை உடனுக்குடன் தீர்த்து வைத்தான்.

எவ்வளவு படித்தாலும் அவ்வப்பொழுது கார்த்திக் மறந்து விட்டு மறுபடியும் மறுபடியும் கண்ணனிடம் சந்தேகம் கேட்பான். கண்ணனும் சலிப்பின்றி சொல்லிக் கொடுத்தான்.

தேர்வு நாளன்று கார்த்திக் மிகவும் பதட்டத்துடன் இருந்தான். கண்ணன் கைகளைப் பிடித்து ஆறுதல் கூறி வாழ்த்தினான். தேர்வு முடிந்தது. ஓரளவு சிறப்பாகச் செய்ததாக கார்த்திக் சொன்னான்.

ஒரு மாதம் கழித்தது. தேர்வு முடிவுகள் வெளியாயின.  தேர்வில் 70 சதவீத மதிப்பெண்கள் பெற்று தேர்ச்சி பெற்றான். கார்த்திகேயன் மற்றும் கண்ணன் இருவருக்கும் மட்டற்ற மகிழ்ச்சி. கார்த்திக்கின் மனைவி மிகவும் மகிழ்ந்தாள்.

கண்ணன் தன் நண்பர்களிடமும் உறவினர்களிடமும் பணியில் ஓய்வு பெற இன்னும் சில ஆண்டுகளே உள்ள நிலையில் தன் தந்தை ஆசிரியர் தகுதித் தேர்வில் தேர்ச்சி பெற்றதைக் கூறி மகிழ்ந்தான்!

(ப.பூரணவள்ளி சேகர், இடைநிலை ஆசிரியர் , ஊராட்சி ஒன்றிய ஆரம்பப் பள்ளி , விரகனூர் , திருப்பரங்குன்றம் ஒன்றியம்)