‘GTA 6’ ட்ரெண்டில் இணைந்த பிரதமர் மோடி: சமூக வலைத்தளங்களில் வைரலாகும் பதிவு!

Su.tha Arivalagan
Nov 19, 2026,12:44 PM IST

புதுடெல்லி:உலகம் முழுவதும் உள்ள வீடியோ கேம் பிரியர்களால் கடந்த 13 ஆண்டுகளாகப் பெரிதும் எதிர்பார்க்கப்பட்ட ‘கிராண்ட் தெஃப்ட் ஆட்டோ 6’ (GTA 6) கேம் இந்தியாவில் இன்று (நவம்பர் 19, 2026) வெளியாகியுள்ளது. இந்த வெளியீட்டைத் தொடர்ந்து இணையதளங்களில் 'GTA 6' குறித்த பதிவுகள் ட்ரெண்டாகி வரும் நிலையில், பிரதமர் நரேந்திர மோடியும் இந்த ட்ரெண்டில் இணைந்து இந்தியாவின் வளர்ச்சியைப் பதிவிட்டுள்ளது சமூக வலைத்தளங்களில் கவனம் ஈர்த்துள்ளது.   


பிரதமர் நரேந்திர மோடி தனது அதிகாரப்பூர்வ 'எக்ஸ்' (X) சமூக வலைத்தளப் பக்கத்தில் "இந்தியா ஒரு முற்றிலும் புதிய ஆட்டத்தை ஆடிக் கொண்டிருக்கிறது!" (India is playing a whole new game!) என்ற வாசகத்துடன் பிரத்யேக கிராஃபிக் புகைப்படம் ஒன்றைப் பகிர்ந்துள்ளார். 'GTA' கேம் போஸ்டர் பாணியில் வடிவமைக்கப்பட்டுள்ள அந்தப் படத்தில், "GTA 5 மற்றும் GTA 6 ஆகியவற்றுக்கு இடைப்பட்ட காலத்தில் இந்தியா எவ்வாறு தன்னை மேம்படுத்திக் கொண்டது" (Between GTA V and VI, here's how India upgraded) என்ற வாசகம் இடம்பெற்றுள்ளது.   




முந்தைய பதிப்பான GTA 5 வெளியானதற்கும், தற்போது 13 ஆண்டுகள் காத்திருப்புக்குப் பிறகு GTA 6 வெளியாகியுள்ளதற்கும் இடைப்பட்ட காலகட்டத்தில் இந்தியா அடைந்த பல்வேறு துறை சார்ந்த வளர்ச்சிகளை இந்தப் புகைப்படம் காட்சிப்படுத்துகிறது. குறிப்பாக, நவீன அதிவேக ரயில் சேவைகள், விமான நிலைய விரிவாக்கம், விண்வெளி ஆராய்ச்சி மற்றும் ராக்கெட் ஏவுதள சாதனைகள், புதுப்பிக்கத்தக்க எரிசக்தி, டிஜிட்டல் பரிவர்த்தனை (UPI), நெடுஞ்சாலை உள்கட்டமைப்பு மற்றும் துறைமுக மேம்பாடு ஆகியவற்றைச் சித்தரிக்கும் ஓவியங்கள் அந்த கிராஃபிக் படத்தில் இடம்பெற்றுள்ளன. 




இளைஞர்கள் மத்தியில் மிகுந்த வரவேற்பைப் பெற்றுள்ள கேமிங் கலாச்சாரத்தின் ட்ரெண்டைப் பயன்படுத்தி, கடந்த பத்தாண்டுகளுக்கும் மேலாக நாட்டில் ஏற்பட்டுள்ள உள்கட்டமைப்பு மற்றும் தொழில்நுட்ப மாற்றங்களைப் பிரதமர் மோடி சுவாரசியமான முறையில் எடுத்துரைத்துள்ளார். பிரதமரின் இந்தப் பதிவிற்கு இளைஞர்கள் மற்றும் இணையவாசிகள் மத்தியில் பெரும் வரவேற்பு கிடைத்துள்ளது. கேமிங் ட்ரெண்டுடன் நாட்டின் வளர்ச்சியை ஒப்பிட்டுப் பதிவிட்டிருப்பது புதுமையாக இருப்பதாகப் பலரும் கருத்து தெரிவித்து வருவதால், இந்தப் பதிவு இணையத்தில் வேகமாகப் பகிரப்பட்டு வைரலாகி வருகிறது.