புதுச்சேரி பாடத்திட்டத்தில் பிரெஞ்சு மொழி நீக்கம்: திமுக சார்பில் போராட்டம் அறிவிப்பு

புதுச்சேரி: புதுச்சேரி மாநிலத்தின் தனித்துவமான அடையாளமாக விளங்கும் பிரெஞ்சு மொழி, சிபிஎஸ்இ (CBSE) பாடத்திட்டத்திலிருந்து நீக்கப்பட்டதற்கு கடும் எதிர்ப்பு கிளம்பியுள்ளது. இந்த முடிவைக் கண்டித்து, புதுச்சேரி மாநில திமுக சார்பில் மிகப்பெரிய அளவில் 'மொழி உரிமைப் போராட்டம்' நடத்தப்படும் என்று எதிர்க்கட்சித் தலைவர் ஆர்.சிவா அறிவித்துள்ளார்.

வரலாற்றுப் பின்னணியும் சர்ச்சையும் :

புதுச்சேரி மாநிலம் நீண்ட காலமாக பிரெஞ்சு கலாச்சாரத்துடனும், அந்த மொழியுடனும் பின்னிப் பிணைந்த ஒரு வரலாற்றைக் கொண்டது. இங்குள்ள அரசுப் பள்ளிகள் மற்றும் தனியார் பள்ளிகளில் பிரெஞ்சு மொழி ஒரு முக்கியப் பாடமாகப் பயிற்றுவிக்கப்பட்டு வந்தது. இந்நிலையில், சிபிஎஸ்இ பாடத்திட்டத்தைக் காரணம் காட்டி பிரெஞ்சு மொழி நீக்கப்பட்டிருப்பது அதிர்ச்சியை ஏற்படுத்தியுள்ளது.

எதிர்க்கட்சித் தலைவர் கண்டனம் :

இது குறித்து அறிக்கை வெளியிட்டுள்ள புதுச்சேரி எதிர்க்கட்சித் தலைவர் ஆர். சிவா, ஆளும் பாஜக அரசை மிகக் கடுமையாகச் சாடியுள்ளார். அவர் வெளியிட்டுள்ள அறிக்கையில், பிரெஞ்சு மொழியை நீக்குவது என்பது புதுச்சேரியின் நீண்டகால மொழி வரலாற்றைச் சிதைத்து, திட்டமிட்டு இந்தியைத் திணிக்கும் ஒரு செயலாகும். புதுச்சேரியின் கலாச்சார அடையாளமான பிரெஞ்சு மொழியைப் பாடத்திட்டத்திலிருந்து அகற்றுவது, இந்த மண்ணின் மைந்தர்களின் உணர்வுகளைப் புண்படுத்தும் செயலாகும்.மாணவர்களிடமோ, பெற்றோர்களிடமோ அல்லது பொதுமக்களிடமோ எந்த விதமான கருத்துக்கணிப்பும் நடத்தாமல், தன்னிச்சையாக இந்த முடிவு எடுக்கப்பட்டுள்ளது."மக்களின் விருப்பத்தைக் கேட்காமல், அவர்களின் கலாச்சார அடையாளங்களை அழிக்கும் வேலையில் ஆளும் பாஜக அரசு ஈடுபட்டுள்ளது. இதனை ஒருபோதும் அனுமதிக்க முடியாது," என்று ஆர். சிவா தெரிவித்துள்ளார்.

திமுகவின் போராட்ட அறிவிப்பு : 

இந்த விவகாரத்தை முன்வைத்து, புதுச்சேரியின் மொழி உரிமையைக் காக்க திமுக சார்பில் மாபெரும் போராட்டம் முன்னெடுக்கப்பட உள்ளது. இந்தப் போராட்டம் மாநிலம் தழுவிய அளவில் மிகப்பெரிய எழுச்சியாக இருக்கும் என்று எதிர்பார்க்கப்படுகிறது.மத்திய அரசின் பாடத்திட்ட மாற்றங்களின் ஒரு பகுதியாக இது பார்க்கப்பட்டாலும், புதுச்சேரி போன்ற யூனியன் பிரதேசங்களுக்கு உள்ள சிறப்பு அந்தஸ்து மற்றும் கலாச்சார முக்கியத்துவத்தை அரசு கருத்தில் கொள்ள வேண்டும் என சமூக ஆர்வலர்கள் கோரிக்கை விடுத்துள்ளனர்.