பட்டுச் சட்டை போட்ட மச்சான்!

- ரா. பிருந்தா ஜெயந்தி, நெய்வேலி

பட்டு சட்ட போட்ட மச்சான் 

பவிசா தான் இருக்காரு.....

பக்கத்துல நா இருக்க  

பாவி மனசு துடிக்குதுங்க .....

பஞ்சாங்கத்த பாத்து

பரிசத்த போட்டு,

பத்திரிக்கைய பாங்கா அடிச்சி,

பங்காளிய அழச்சு,

பந்தக் காலும் நட்டு,

பாந்தமா தான் தாலிய கட்டி,

பந்தமா ஆகும் நாளும் 

எந்நாளோ.....

முத்தமிழ் முருகன் அருளால.....

குறை இல்லாம 

குறி கேக்க,

பொருத்தத்தைப் பார்க்கச் சொல்லி, 

என்னைப் பெத்த ராசாவ

பொறுப்போட அனுப்பி வச்சேன்.....

இந்த மச்சான் பொருத்தமுன்னா, 

எங் குல சாமிக்கு

குலவ விட்டு, பொங்க வைக்க நேந்துக்கிட்டேன்......

குல சாமியும் 

மச்சானை பொருத்தமா என்னோட சேத்து வச்சி 

ஊரும் உறவும் கூடி

மனம் குளிர 

குலம் தழைக்க வாழ்த்துறைச்சு

கல்யாணமும் முடிச்சி வச்சி 

குடுத்தனமும் சேர்த்து வச்சி 

குதூகலமாய் வாழறோம்......

நேர்ந்தாற் போல 

குல சாமிக்கு 

பொங்க வச்சி 

கும்பிட்டு

குதூகலமா வாழறோமே.....!