காலம் கற்றுத் தந்த பாடங்கள்!

-மு.ரம்யா ஆனந்த்

வாழ்க்கை என்னும் பள்ளியிலே,

வகுப்புகள் பல கடந்துவிட்டேன்!

புத்தகத்தில் இல்லாத பாடங்களை,

அனுபவத்தில் கற்றுக்கொண்டேன்!

சிலர் வந்தார்கள் உறவாக,

சிலர் வந்தார்கள் நட்பாக!

யார் யாரென்று புரிந்துகொண்டேன்,

காலம் காட்டிய காட்சிகளால்!

அவசரத்தில் எடுத்த முடிவுகள்,

அறிவின் மதிப்பை உணர்த்தின!

அமைதியாகக் கடந்த தருணங்கள்,

பொறுமையின் அர்த்தத்தை விளக்கின!

எல்லாக் கேள்விகளுக்கும்

உடனே விடை கிடைப்பதில்லை!

சில உண்மைகள் புரிவதற்கு,

காலத்தைத் தவிர ஆசானில்லை!

நேற்று சரியென்று நினைத்தவை,

இன்று தவறென்று புரியலாம்!

நேற்று தவறென்று நினைத்தவை,

இன்று அனுபவமாக மாறலாம்!

வார்த்தைகள் இனிமையாக இருப்பதால்,

எண்ணங்கள் நல்லவை ஆகிவிடாது!

செயல்கள் சிறியதாக இருப்பதால்,

அதன் மதிப்பும் குறைந்துவிடாது!

ஒருவரின் வாழ்க்கையைப் பார்த்து,

அவரது கதையை முடிவு செய்யாதே!

ஒரு பக்கத்தை மட்டும் படித்துவிட்டு,

முழுப் புத்தகத்தையும் தீர்மானிக்காதே!

கிடைத்ததை மதிக்கக் கற்றுக்கொள்,

இழந்ததைப் பாடமாக ஏற்றுக்கொள்!

மாறும் சூழலைப் புரிந்துகொண்டு,

மனிதர்களை மதிக்கக் கற்றுக்கொள்!

எல்லாவற்றையும் நம்மால் மாற்ற முடியாது,

எல்லாவற்றையும் புரிந்துகொள்ளவும் முடியாது!

ஆனால் ஒவ்வொரு அனுபவத்திலிருந்தும்,

ஏதாவது ஒன்றைக் கற்றுக்கொள்ளலாம்!

இளமையில் புரியாத உண்மைகள்,

வயது கூடும்போது புரிகின்றன!

கடந்து வந்த பாதைகளை நினைத்தால்,

பல புதிர்களுக்கு விடை கிடைக்கின்றன!

காலம் திரும்பி வருவதில்லை,

கடந்த நாட்கள் மீண்டும் கிடைப்பதில்லை!

ஆனால் காலம்  கற்பித்த பாடங்கள் மட்டும்,

கடைசிவரை நம்மைவிட்டுப் பிரிவதில்லை!

வாழ்க்கை எனக்குக் கொடுத்த

ஒவ்வொரு அனுபவமும் ஒரு பாடம்!

அதைப் புரிந்துகொண்ட பிறகுதான்

என் பயணத்தின் அர்த்தம் புரிந்தது!

இன்று நான் அறிந்துகொண்ட உண்மை ஒன்று…

வாழ்க்கை நமக்குக் கற்றுக்கொடுப்பதை,

வேறு எந்தப் பள்ளியும் கற்றுத்தர முடியாது!

காலம் கடந்து போகிறது…

ஆனால் அது கற்றுத் தந்த பாடங்கள்

நம்மோடு வாழ்ந்துகொண்டே இருக்கின்றன!

(கவிஞர் மு. ரம்யா ஆனந்த், D.T.Ed., M.A., M.Ed. கல்வித் தகுதிகளைப் பெற்றவர். கல்வித்துறையில் ஆர்வம் கொண்டவர். ஆசிரியர் பணிக்கான போட்டித் தேர்வுகளுக்குத் தயாராகி வருவதுடன், பெண்களின் உணர்வுகள், வாழ்க்கை அனுபவங்கள், தன்னம்பிக்கை மற்றும் மனித உறவுகளை மையமாகக் கொண்டு கவிதைகள் எழுதுவதிலும் ஆர்வம் கொண்டவர். தனது எழுத்துகளின் மூலம் வாசகர்களின் மனதில் நல்ல சிந்தனைகளையும் நம்பிக்கையையும் விதைப்பதை விரும்புகிறார்)