நற்பெயருடன் வாழ்வோம்.. திருக்குறள் சொல்லும் வாழ்க்கை (3)

- கவிஞர் மு. ரம்யா ஆனந்த்

திருக்குறள்

மலர்மிசை ஏகினான் மாணடி சேர்ந்தார்

நிலமிசை நீடுவாழ் வார்.

பொருள்

மலர்மேல் வீற்றிருக்கும் இறைவனின் சிறந்த திருவடிகளைச் சார்ந்தவர்கள் இவ்வுலகில் நீடித்த புகழுடன் வாழ்வார்கள்.

சிறுகதை: மலரின் மணம்!

ஒரு கிராமத்தில் இனியன் என்ற சிறுவன் வாழ்ந்தான். அவன் ஏழையாக இருந்தாலும், அனைவரிடமும் அன்பாகப் பழகினான். தன்னால் முடிந்த உதவிகளைப் பிறருக்குச் செய்தான்.

ஒருநாள் ஆசிரியர் அவனிடம், “உன்னை எல்லோரும் ஏன் விரும்புகிறார்கள்?” என்று கேட்டார்.

“நான் எல்லோரிடமும் அன்பாக இருக்கிறேன், ஐயா!” என்றான் இனியன். ஆசிரியர் மகிழ்ந்து, “மலர் தன் மணத்தால் பிறருக்கு மகிழ்ச்சி தருவதுபோல, நம் வாழ்க்கையும் நற்பண்புகளால் சிறக்க வேண்டும்,” என்றார்.

அன்று இனியன், இறைநம்பிக்கையுடன் நல்ல வழியில் வாழ்வதன் முக்கியத்துவத்தையும் பிறரிடம் அன்பு காட்டுவதன் மதிப்பையும் உணர்ந்தான்.

வாழ்க்கைப் பாடம்

இறைவனின் திருவடிகளைச் சார்ந்து வாழ்வதன் சிறப்பைத் திருவள்ளுவர் எடுத்துரைக்கிறார். நற்பண்புகளுடன் வாழ்வதும் பிறருக்கு நன்மை செய்வதும் நம் வாழ்க்கையைப் பயனுள்ளதாக மாற்றும்.

மலரைப் போல நம் வாழ்க்கையும் நன்மையின் மணத்தைப் பரப்பட்டும்!

(கவிஞர் மு. ரம்யா ஆனந்த், D.T.Ed., M.A., M.Ed. கல்வித் தகுதிகளைப் பெற்றவர். கல்வித்துறையில் ஆர்வம் கொண்டவர். ஆசிரியர் பணிக்கான போட்டித் தேர்வுகளுக்குத் தயாராகி வருவதுடன், பெண்களின் உணர்வுகள், வாழ்க்கை அனுபவங்கள், தன்னம்பிக்கை மற்றும் மனித உறவுகளை மையமாகக் கொண்டு கவிதைகள் எழுதுவதிலும் ஆர்வம் கொண்டவர். தனது எழுத்துகளின் மூலம் வாசகர்களின் மனதில் நல்ல சிந்தனைகளையும் நம்பிக்கையையும் விதைப்பதை விரும்புகிறார்)