Roston Chase.. வெஸ்ட் இண்டீஸ் Test அணிக்கு புதிய கேப்டன்.. 2 வருட கேப்புக்குப் பிறகு விளையாடுகிறார்!

பார்படாஸ்: மேற்கு இந்தியத் தீவுகள் டெஸ்ட் அணியின் புதிய கேப்டனாக ஆல் ரவுண்டர் ராஸ்டன் சேஸ் நியமிக்கப்பட்டுள்ளார். இதுவரை கேப்டனாக இருந்து வந்த கிரேக் பிரத்வைட் அப்பொறுப்பிலிருந்து சில மாதங்களுக்கு முன்பு விலகிய நிலையில் புதிய கேப்டனாகியுள்ளார் ராஸ்டன் சேஸ்.

ஆஸ்திரேலிய அணி ஜூன் மற்றும் ஜூலை மாதங்களில் மேற்கு இந்தியத் தீவுகளுக்கு வருகை தரவுள்ளது 3 போட்டிகள் கொண்ட டெஸ்ட் தொடரில் விளையாடவுள்ளது. அந்தத் தொடர்தான் கேப்டனாக ராஸ்டன் சேஸுக்கு முதல் தொடராகும். சேஸ் டெஸ்ட் கிரிக்கெட்டில் 49 போட்டிகள் ஆடியுள்ளார்.  அதேசமயம் அவர் கடைசியாக டெஸ்ட் போட்டியில் ஆடியது 2 ஆண்டுகளுக்கு முன்பு என்பது மிகவும் சுவாரஸ்யமான தகவல். இவ்வளவு கேப் விட்டு விட்ட நிலையில் தற்போது சேஸ் டெஸ்ட் அணிக்கு கேப்டனாகியிருப்பது பலரையும் வியப்பில் ஆழ்த்தியுள்ளது.

2016ம் ஆண்டு டெஸ்ட் போட்டியில் அறிமுகமானார் சேஸ்.  இதுவரை 26.33 என்ற  சராசரியுடன் 2000க்கும் மேற்பட்ட ரன்களை எடுத்துள்ளார். இதில் 5 சதங்களும், 11 அரை சதங்களும் அடக்கம். 85 விக்கெட்களையும் அவர் வீழ்த்தியுள்ளார்.

தற்போது அயர்லாந்தில் மேற்கு இந்தியத் தீவுகள் அணி ஒரு நாள் தொடரில் பங்கேற்று ஆடி வருகிறது. அந்த அணியுடன் இணைந்து விளஐயாடி வருகிறார் ராஸ்டன் சேஸ்.  அயர்லாந்து தொடர் முடிந்ததும், இங்கிலாந்துக்கு எதிராக இந்த மாத இறுதியில் 3 போட்டிகள் கொண்ட ஒரு நாள் தொடரில் மேற்கு இந்தியத் தீவுகள் அணி விளையாடவுள்ளது.

மேற்கு இந்தியத் தீவுகள் அணிக்கு எதிரான முதல் டெஸ்ட் போட்டி ஜூன் 25 முதல் 29ம் தேதி வரை பிரிஜ்டவுனில் நடைபெறும்.