வருமா ஒரு நாள்?

- செ. சாந்தி சின்னத்தம்பி, மதுரை

பிறந்து தவழ்ந்து நடை பயின்று

ஓடி ஆடி விளையாடிய மண்ணில் 

நான் கால் பதிக்கும் நாள் மீண்டும் வருமா ?

அம்மாவின் கைபிடித்து 

ஆசையாய் அலங்காரம் செய்து 

நடந்த திருவருணை நகர வீதிகளைக்

காணும் நாள் மீண்டும் வருமா ?

அன்புத் தோழமைகள் 

அருகிருந்து கதைத்த கதை 

அனு தினமும் சிரித்து மகிழ்ந்த நிலை 

இனி ஒரு நாள் மீண்டும் வருமா ?

கார்த்திகை தீபத் திருவிழாவிலே 

அதிகாலை வேளையிலே 

புதுக்காற்றைச் சுவாசித்து 

கிரிவலம் வரும்போது 

மனசெல்லாம் நிறைந்து 

முகமெல்லாம் புன்னகைக்கும்

புது நாளும் இனி வருமா ?

திருக்கோயில் தனிலே 

காலாற நடந்து குளத்தருகே அமர்ந்து 

இறைமணம் கமழும் 

பவளமல்லிப் பூ வாசமும் 

அருள் வடிவான அம்மையப்பனைக் கண்ட அருள் நிலையும் 

அனுபவிக்கும் ஒரு நாள் மீண்டும் வருமா ?

இருபது ஆண்டுகளுக்கு மேலாகி 

போக இயலா நிலையாகி 

இறை காணும் ஏக்கம் மட்டும் பெரிதாகி 

என் இறுதி நாட்களுக்குள்ளாவது 

காணும் ஒரு நாள் வருமா?

(செ.சாந்தி சின்னத்தம்பி, அரசுப் பள்ளி தமிழாசிரியர் (ஓய்வு) மதுரை. சேலம் , பாரதியார் கல்வியியல் கல்லூரி விரிவுரையாளர் பணிபுரிந்துள்ளேன். (2 ஆண்டுகள்) ஆர்வம்: கவிதை, இசை,பாடல், நாடகம் புனைதல். வெளியிட்ட கவிதை நூல்கள்: 2. 1. விழி மூடி யோசித்தால் 2. மௌனமும் பழகிடு. தொகுப்பு நூல்கள். 4.  சென்னையில் நடந்த நேரடி கவிதை போட்டியில் கலந்து கொண்டு முதல் பரிசு பெற்றது பெருமை)