மகாராஷ்டிரா துணை முதல்வராக சுனேத்ரா பவார் இன்று மாலை பதவியேற்பு

மும்பை: மகாராஷ்டிர துணை முதல்வராக மறைந்த அஜீத் பவாரின் மனைவி சுனேத்ரா பவார் பதவியேற்க உள்ளார். இவர் இன்று மாலை 5 மணிக்கு துணை முதல்வராக பதவியேற்க உள்ளதாக தகவல்கள் வெளியாகி உள்ளன.

மகாராஷ்டிர மாநில துணை முதல்வர் அஜித் பவார் சமீபத்தில் பராமதியில் நடந்த விமான விபத்தில் காலமானார். இதனைத் தொடர்ந்து, காலியாக உள்ள துணை முதல்வர் பதவிக்கு அவரது மனைவியும், மாநிலங்களவை உறுப்பினருமான (MP) சுனேத்ரா பவார் நியமிக்கப்பட வாய்ப்புள்ளதாக தேசியவாத காங்கிரஸ் (NCP) கட்சி வட்டாரங்கள் தெரிவித்து வந்தன. இன்று மாலை 5 மணிக்கு அவர் துணை முதல்வராகப் பதவியேற்கக்கூடும் என்று எதிர்பார்க்கப்படுகிறது. அவ்வாறு பதவியேற்றால், மகாராஷ்டிர மாநிலத்தின் முதல் பெண் துணை முதல்வர் என்ற பெருமையை அவர் பெறுவார்.

மும்பையில் இன்று நடைபெறவுள்ள தேசியவாத காங்கிரஸ் கட்சியின் நாடாளுமன்றக் குழுக் கூட்டத்தில், சட்டமன்றக் கட்சித் தலைவராக சுனேத்ரா பவார் முறைப்படி தேர்ந்தெடுக்கப்படுவார் என்று மூத்த தலைவர் சாகன் புஜ்பால் தெரிவித்துள்ளார். 2024 மக்களவைத் தேர்தலில் பராமதி தொகுதியில் போட்டியிட்டு தோல்வியடைந்த சுனேத்ரா பவார், பின்னர் மாநிலங்களவை உறுப்பினராகத் தேர்ந்தெடுக்கப்பட்டார். தற்போது அவர் மாநில சட்டமன்றத்தின் எந்த அவையிலும் உறுப்பினராக இல்லை. எனினும், அஜித் பவாரின் மறைவால் காலியாகியுள்ள பராமதி சட்டமன்றத் தொகுதியில் அவர் போட்டியிட வாய்ப்புள்ளது.

சுனேத்ரா பவாரின் நியமனம் குறித்து கட்சியின் முடிவு எடுக்கப்பட்டால், இன்று மாலை பதவியேற்பு விழா நடத்துவதில் தமக்கு எந்தத் தடையும் இல்லை என்று முதலமைச்சர் தேவேந்திர ஃபட்னாவிஸ் தெரிவித்துள்ளார். அஜித் பவாரின் மறைவுக்குப் பிறகு கட்சிப் பொறுப்புகளையும், அரசுப் பொறுப்புகளையும் சுனேத்ரா பவார் ஏற்பது கட்சியினரிடையே ஒருமித்த முடிவாக எழுந்துள்ளதாகத் தெரிகிறது.