மக்களே உஷார்...தமிழகத்தில் தீவிரமடையும் டெங்கு காய்ச்சல்: ஒரே நாளில் 1320 பேர் பாதிப்பு

சென்னை : தமிழகத்தில் பருவமழை மற்றும் காலநிலை மாற்றங்கள் காரணமாக டெங்கு காய்ச்சல் மற்றும் பருவகாலக் காய்ச்சலின் தாக்கம் வேகமாக அதிகரித்து வருகிறது. சுகாதாரத்துறை வெளியிட்டுள்ள சமீபத்திய தரவுகளின்படி, மாநிலத்தின் பல பகுதிகளில் காய்ச்சல் பாதிப்புகள் தொடர்ந்து உயர்ந்து வருகின்றன.   

ஒரே நாளில் 1,320 பேருக்கு காய்ச்சல்:

தமிழ்நாடு முழுவதும் நேற்று ஒரே நாளில் மட்டும் 1,320 பேர் காய்ச்சலால் பாதிக்கப்பட்டுள்ளனர். தீவிர பரிசோதனைகளுக்குப் பிறகு, இதில் 244 பேருக்கு டெங்கு காய்ச்சல் உறுதி செய்யப்பட்டுள்ளது.   

சென்னையில் அதிகரிக்கும் பாதிப்புகள் : 

தலைநகர் சென்னையிலும் டெங்குவின் தாக்கம் தீவிரமடைந்து வருகிறது. நேற்று ஒரே நாளில் சென்னையில் காய்ச்சல் காரணமாக 156 பேர் பல்வேறு மருத்துவமனைகளில் அனுமதிக்கப்பட்டு சிகிச்சை பெற்று வருகின்றனர். அவர்களில் 87 பேருக்கு டெங்கு பாதிப்பு இருப்பது பரிசோதனையில் உறுதி செய்யப்பட்டுள்ளது. 

டெங்குவின் அறிகுறிகள் :

ஏடிஸ் (Aedes) வகை கொசுக்களால் பரவும் இந்த டெங்கு காய்ச்சலால் பாதிக்கப்பட்டவர்களுக்குப் பின்வரும் அறிகுறிகள் தென்படலாம்:

கடுமையான காய்ச்சல் மற்றும் தலைவலி கண்கள், மூட்டுகள் மற்றும் தசைப் பகுதிகளில் தீவிர வலி, உடற்சோர்வு, வாந்தி மற்றும் பசியின்மை, தோலில் சிவப்பு நிறத் தடிப்புகள் (Rashes)

தடுப்பு நடவடிக்கைகள் மற்றும் விழிப்புணர்வு: டெங்கு காய்ச்சல் பரவுவதைத் தடுக்க உள்ளாட்சி அமைப்புகளும் சுகாதாரத் துறையும் தீவிர தடுப்பு நடவடிக்கைகளை மேற்கொண்டு வருகின்றன.

கொசு உற்பத்தியைக் கட்டுப்படுத்துதல்: 

வீடுகள் மற்றும் அலுவலகங்களைச் சுற்றி நீர் தேங்காமல் பார்த்துக் கொள்வது அவசியம். மொட்டை மாடிகள், டயர்கள், பூந்தொட்டிகள் மற்றும் உடைந்த பாத்திரங்களில் நன்னீர் தேங்கினால் ஏடிஸ் கொசுக்கள் எளிதில் இனப்பெருக்கம் செய்யும்.

பாதுகாப்பு முறைகள்: 

கொசுக்கடியிலிருந்து தப்பிக்கக் கொசுவலைகள் மற்றும் கொசு விரட்டிகளைப் பயன்படுத்த வேண்டும். பகல் நேரங்களிலேயே இந்த ஏடிஸ் கொசுக்கள் அதிகளவில் கடிக்கின்றன என்பதால் கூடுதல் விழிப்புணர்வு தேவை.

சிகிச்சை முறைகள்: 

காய்ச்சல் அறிகுறிகள் தென்பட்டால் உடனடியாக அருகில் உள்ள அரசு அல்லது தனியார் மருத்துவமனையை அணுகி ரத்தப் பரிசோதனை செய்துகொள்ள வேண்டும். சுய மருத்துவம் செய்துகொள்வதைத் தவிர்க்குமாறு மருத்துவர்கள் கேட்டுக்கொண்டுள்ளனர்.பொதுமக்கள் வீடுகளையும் சுற்றப்புறத்தையும் தூய்மையாக வைத்துக்கொண்டு, காய்ச்சல் அறிகுறிகள் இருந்தால் உடனடியாக மருத்துவ சிகிச்சை பெற வேண்டும் எனச் சுகாதாரத்துறை அறிவுறுத்தியுள்ளது.