திருநள்ளாறு சனிப்பெயர்ச்சி 2026: விழுப்புரம் - நாகை இடையே சிறப்பு ரயில்கள்

காரைக்கால்: உலகப்புகழ் பெற்ற திருநள்ளாறு ஸ்ரீ தர்பாரண்யேஸ்வரர் ஆலயத்தில் நடைபெறவுள்ள சனிப்பெயர்ச்சி விழாவை முன்னிட்டு, லட்சக்கணக்கான பக்தர்கள் வருகை தருவார்கள் என எதிர்பார்க்கப்படுகிறது. 

பக்தர்களின் பயண வசதியை எளிதாக்கும் வகையில், தெற்கு ரயில்வே விழுப்புரம் மற்றும் நாகப்பட்டினம் இடையே சிறப்பு பயணிகள் ரயில்களை இயக்க முடிவு செய்துள்ளது.

சிறப்பு ரயில்களின் கால அட்டவணை :

மார்ச் மாதம் சனிப்பெயர்ச்சி விழா நடைபெறுவதை ஒட்டி, மார்ச் 6 மற்றும் மார்ச் 7 ஆகிய தேதிகளில் இந்த சிறப்பு ரயில்கள் இயக்கப்பட உள்ளன.

விழுப்புரத்தில் இருந்து காலை 9.10 மணிக்கு புறப்படும் இந்த ரயில், கடலூர், சிதம்பரம், மயிலாடுதுறை வழியாக பகல் 1.05 மணிக்கு நாகப்பட்டினம் சென்றடையும். மறுமார்க்கமாக  நாகப்பட்டினத்தில் இருந்து பகல் 1.20 மணிக்கு புறப்படும் ரயில், மாலை 5.30 மணிக்கு விழுப்புரம் வந்தடையும். 

இந்த சிறப்பு ரயில்கள் திருநள்ளாறு செல்லும் பக்தர்களுக்கு மட்டுமின்றி, நாகூர் மற்றும் வேளாங்கண்ணி செல்லும் பயணிகளுக்கும் மிகவும் பயனுள்ளதாக இருக்கும்.

சனிப்பெயர்ச்சி 2026: 

ஜோதிட சாஸ்திரப்படி, மந்தகாரகன் என்று அழைக்கப்படும் சனி பகவான், கும்ப ராசியில் இருந்து மீன ராசிக்கு மார்ச் 06ம் தேதி பெயர்ச்சி அடைகிறார்.

மாலை 05:40 மணிக்கு இந்த சனிப் பெயர்ச்சி நடைபெற உள்ளது. இந்த 2026 சனிப்பெயர்ச்சியால் தனுசு ராசிக்காரர்களுக்கு ஏழரை சனி முழுமையாக விலகுகிறது. அதே சமயம், மேஷ ராசிக்காரர்களுக்கு ஏழரை சனியின் தொடக்கமும், கும்ப ராசிக்காரர்களுக்கு ஜென்ம சனியும், மீன ராசிக்காரர்களுக்கு விரய சனியும் அமைகிறது.

திருநள்ளாறில் பலத்த பாதுகாப்பு ஏற்பாடுகள் :

சனிப்பெயர்ச்சி விழாவையொட்டி புதுச்சேரி மாநில அரசும், காரைக்கால் மாவட்ட நிர்வாகமும் விரிவான ஏற்பாடுகளைச் செய்து வருகின்றன. முதியவர்கள் மற்றும் மாற்றுத்திறனாளிகளுக்குத் தனி வரிசைகள் அமைக்கப்பட்டுள்ளன. புனித நீராட வரும் பக்தர்களுக்காக நளன் குளத்தில் சுத்தமான நீர் மற்றும் பாதுகாப்பு வேலிகள் அமைக்கப்பட்டுள்ளன. ரயில் நிலையங்களில் இருந்து திருநள்ளாறு கோவிலுக்குச் செல்ல சிறப்புப் பேருந்துகளும் இயக்கப்பட உள்ளன.

வெயிலின் தாக்கம் அதிகமாக இருக்கும் என்பதால் போதுமான குடிநீர் பாட்டில்களைக் கையுடன் வைத்திருக்கவும். கூட்ட நெரிசலைத் தவிர்க்க ரயில்களில் முன்கூட்டியே திட்டமிட்டுப் பயணிக்க அறிவுறுத்தப்படுகிறார்கள்.