தகுதி நீக்கமா? ராஜினாமா செய்த 4 எம்எல்ஏ.,க்களுக்கு சபாநாயகர் நோட்டீஸ்!

சென்னை: தமிழக அரசியலில் பெரும் பரபரப்பை ஏற்படுத்திய கட்சித் தாவல் விவகாரத்தில், அதிமுகவிலிருந்து விலகி தமிழக வெற்றிக் கழகத்தில் (தவெக) இணைந்த முன்னாள் சட்டமன்ற உறுப்பினர்கள் 4 பேருக்கு சபாநாயகர் பிரபாகர் முறைப்படி நோட்டீஸ் அனுப்பியுள்ளார். "உங்கள் மீது ஏன் தகுதி நீக்க நடவடிக்கை எடுக்கக் கூடாது?" என்று கேள்வி எழுப்பியுள்ள சபாநாயகர், இதற்கு 7 நாட்களுக்குள் விளக்கமளிக்க வேண்டும் என உத்தரவிட்டுள்ளார்.

சமீபத்தில் நடைபெற்ற தமிழக சட்டப்பேரவை கூட்டத்தொடரில், தவெக அரசுக்கு ஆதரவாக அதிமுகவைச் சேர்ந்த 25 சட்டமன்ற உறுப்பினர்கள் (MLA-க்கள்) வாக்களித்ததாகக் கூறி, அவர்கள் மீது கட்சித் தாவல் தடைச் சட்டத்தின் கீழ் நடவடிக்கை எடுக்க வேண்டும் என அதிமுக தலைமை, சபாநாயகரிடம் புகார் அளித்திருந்தது. இருப்பினும், சில அரசியல் நகர்வுகளுக்குப் பிறகு, அந்த 25 பேரில் 21 பேர் மீதான புகாரை அதிமுக திரும்பப் பெற்றுக் கொண்டதாக சபாநாயகர் அதிகாரப்பூர்வமாக அறிவித்திருந்தார். இதனால் அந்த 21 பேரின் பதவிகளுக்கு எவ்வித ஆபத்தும் இல்லாமல் தப்பியது. அவர்கள் தகுதிநீக்கம் செய்யப்பட மாட்டார்கள் என சபாநாயகர் ஏற்கனவே அறிவித்து விட்டார்.

ஆனால், எஞ்சிய 4 சட்டமன்ற உறுப்பினர்களான ஜெயக்குமார், இசக்கி சுப்பையா, மரகதம் குமரவேல் மற்றும் சத்யபாமா ஆகியோர் தங்களது பதவிகளை ஏற்கனவே ராஜினாமா செய்துவிட்டு, முறைப்படி தமிழக வெற்றிக் கழகத்தில் (தவெக) தங்களை இணைத்துக் கொண்டனர். இவர்கள் பதவியை ராஜினாமா செய்திருந்தாலும், அவர்கள் மீதான கட்சித் தாவல் தடைச் சட்டப் புகார் சபாநாயகரின் பரிசீலனையில் இன்னமும் நிலுவையிலேயே உள்ளது. இதன் காரணமாகவே, சபாநாயகர் இந்த அதிரடி நோட்டீஸை அனுப்பியுள்ளார்.

"அதிமுக சின்னத்தில் போட்டியிட்டு வென்றுவிட்டு, கட்சித் தாவல் நடவடிக்கைகளில் ஈடுபட்டதாக எழுந்துள்ள புகார் குறித்து, சம்பந்தப்பட்ட 4 முன்னாள் எம்.எல்.ஏ-க்களும் 7 நாட்களுக்குள் உரிய விளக்கம் அளிக்க வேண்டும்." என கூறி சபாநாயகர் நோட்டீஸ் அனுப்பி உள்ளார்.