சட்டசபையை வென்ற கையோடு.. நாடாளுமன்றத்திற்குள்ளும் நுழைய தவெகவுக்கு ஒரு அரிய வாய்ப்பு!

சென்னை: தமிழக வெற்றி கழகம் கட்சிக்கு 1 எம்பி அதாவது மாநிலங்களவை எம்பி கிடைக்கும் வாய்ப்பு உருவாகி உள்ளது.

தமிழக வெற்றி கழகம் சமீபத்தில் நடந்த சட்டசபை தேர்தலில் விஜய் தலைமையில் மிகப் பிரமாண்டமான முறையில் வெற்றியை ஈட்டி உள்ளது. தமிழக அரசியல் வரலாற்றில் இதுவரை இல்லாத அளவுக்கு தனிப்பெரும் கட்சியாக உருவெடுத்து நாளை ஆட்சி அமைக்கவும் உள்ளது.

விஜய்யின் இந்த புதிய அரசியல் வருகை தமிழக அரசியல் களத்தை ஏற்கனவே சூடாக்கி உள்ள நிலையில் தற்போது விஜய் ஆட்சி அமைப்பதற்கு காங்கிரஸ் கட்சி நிபந்தனையற்ற ஆதரவை தெரிவித்துள்ளது. காங்கிரஸ் கட்சி எம்எல்ஏக்கள் உள்ளிட்ட நிர்வாகிகள் இன்று தமிழக வெற்றிக்கழகம் கட்சி தலைவர் விஜயை அவரது பனையூர் அலுவலகத்தில் சந்தித்து பேசி ஆதரவு கடிதத்தையும் கொடுத்தனர்.

இந்த நிலையில் தமிழக வெற்றிக்கழகம் கட்சி நாடாளுமன்றத்திற்குள்ளும் நுழையும் வாய்ப்பு உருவாகுது. அதிமுக சார்பில் முன்னாள் அமைச்சர் சிவி சண்முகம் தற்போது மாநிலங்களவை உறுப்பினராக உள்ளார். இந்த நிலையில் அவர் சட்டசபை தேர்தலில் மைலம் தொகுதியில் போட்டியிட்டு வென்றுள்ளார். ஒரு உறுப்பினர் இரு பதவிகளை வகிக்க முடியாது என்பதால் அந்த அடிப்படையில் நாடாளுமன்ற மாநிலங்களவை உறுப்பினர் பதவியை ராஜினாமா செய்ய உள்ளார் சி.வி.சண்முகம்.

தற்போது சட்டசபையில் தனிப்பட்ட முறையில் தமிழக வெற்றி கழகம் கட்சிக்கு அதிக உறுப்பினர்கள் உள்ளனர். எனவே காலியாகும் இந்த மாநிலங்களவை உறுப்பினர் பதவிக்கு தமிழக வெற்றிக்கழகம் சார்பில் வேட்பாளரை நிறுத்தி வெற்றி பெறச் செய்ய முடியும் என்பதால் மிகக் குறுகிய காலத்தில் சட்டசபை தேர்தலில் வென்றதோடு மாநிலங்களவைக்கும் அதாவது நாடாளுமன்றத்திற்குள்ளும் காலடி வைக்கும் அரிய வாய்ப்பு விஜய் கட்சிக்கு கிடைத்துள்ளது.

ஒரு புதிய கட்சி சட்டசபை தேர்தலில் வெற்றி பிளஸ் நாடாளுமன்றத்தில் ஒரு வெற்றி என்று இதுவரை தமிழக வரலாற்றில் நடந்ததில்லை. அப்படி நடக்கும் போது இது இன்னும் ஒரு சாதனையாக விஜயின் வெற்றி மகுடத்தில் வந்து சேரும்.