தமிழகத்திலும் பீகார் பார்முலா... பாஜக மீது விசிக வன்னி அரசு விமர்சனம்

சென்னை: தமிழக அரசியலில் பாரதிய ஜனதா கட்சியின் வியூகங்கள் குறித்து விடுதலைச் சிறுத்தைகள் கட்சியின் (விசிக) துணைப் பொதுச்செயலாளர் வன்னி அரசு கடுமையான விமர்சனங்களை முன்வைத்துள்ளார். பீகாரில் நிகழ்ந்த அரசியல் மாற்றங்களைப் போலவே தமிழகத்திலும் ஒரு திட்டத்தை அரங்கேற்ற பாஜக முயன்று வருவதாக அவர் எச்சரித்துள்ளார்.

பீகார் மாநிலத்தில் நிலவும் தற்போதைய அரசியல் சூழலை பாஜக தனது சதியால் கைப்பற்றியுள்ளதாக வன்னி அரசு தெரிவித்துள்ளார். குறிப்பாக, அம்மாநில முதலமைச்சர் பதவியை நிதிஷ்குமார் ராஜினாமா செய்ய வைக்கப்பட்டதன் மூலம், அவரை மாநில அரசியலிலிருந்தே பாஜக வெற்றிகரமாக அப்புறப்படுத்தியுள்ளதாக அவர் சுட்டிக்காட்டியுள்ளார்.பீகாரில் கடைபிடிக்கப்பட்ட அதே "பீகார் பார்முலாவை" (Bihar Formula) தமிழகத்திலும் முன்னெடுக்க பாஜக திட்டமிட்டு வருவதை புரிந்து கொள்ள முடிகிறது என்று அவர் கூறியுள்ளார். இதன் மூலம் தமிழகத்தின் திராவிட அரசியலில் மாற்றத்தை ஏற்படுத்த பாஜக முனைவதாக அவர் கருதுகிறார்.

தேர்தலுக்குப் பிறகு அதிமுக என்ற மாநிலக் கட்சியே இல்லாமல் போவதற்கு அதிக வாய்ப்புகள் உள்ளதாக வன்னி அரசு அதிரடியான கணிப்பை வெளியிட்டுள்ளார். மேலும், இது தொடர்பாக எடப்பாடி பழனிசாமி என்னதான் புலம்பினாலும், அவரையும் அதிமுகவையும் யாராலும் காப்பாற்ற முடியாது என்றும் அவர் குறிப்பிட்டுள்ளார்.

பீகாரில் ஐக்கிய ஜனதா தளம் கட்சியுடன் கூட்டணி அமைத்து போட்டியிட்டது பாஜக. நிதிஷ்குமார் தலைமையில் புதிய அரசு அமைந்து 3 மாதங்களே ஆகும் நிலையில், அவர் தவது முதல்வர் பதவியை ராஜினாமா செய்து விட்டு, ராஜ்ய சபா தேர்தலில் போட்டியிட போவதாக அறிவித்துள்ளார்.

அதோடு பீகார் முதல்வர் பொறுப்பை பாஜக.,விடம் ஒப்படைக்க அவர் திட்டமிட்டுள்ளதாக சொல்லப்படுகிறது. மாநில அரசியலில் இருந்து நிதிஷ் குமாரை அகற்றியதுடன், பீகாரில் ஆட்சியை கைப்பற்ற உள்ளது பாஜக. இதே நிலை நாளை தமிழகத்தில் அதிமுக மற்றும் எடப்பாடி பழனிச்சாமிக்கு ஏற்படலாம் என வன்னி அரசு எச்சரித்துள்ளார்.