தமிழக காங்கிரஸ் தலைவர் மாற்றப்படுகிறாரா? டெல்லியில் தீவிர ஆலோசனை

சென்னை: தமிழ்நாடு உள்ளிட்ட நாட்டின் பல்வேறு மாநிலங்களில் காங்கிரஸ் கட்சியின் மாநிலத் தலைவர்களை மாற்றிவிட்டு, புதிய நிர்வாகிகளை நியமிப்பதற்கான ஆலோசனைகள் தலைநகர் டெல்லியில் தீவிரமாக நடைபெற்று வருவதாகத் தகவல்கள் வெளியாகியுள்ளன. 

இந்த நிலையில், தமிழக காங்கிரஸ் கமிட்டியின் புதிய தலைவராகத் தேர்ந்தெடுப்பதற்கான பெயர்ப் பரிசீலனையில், விருதுநகர் நாடாளுமன்ற உறுப்பினர் மாணிக்கம் தாகூர் முன்னிலையில் இருப்பதாகக் கூறப்படுகிறது.

அண்மையில் நடந்து முடிந்த தேர்தல்கள் மற்றும் கட்சியின் உட்கட்சி கட்டமைப்பை வலுப்படுத்தும் நோக்கில், அகில இந்திய காங்கிரஸ் கமிட்டி பல்வேறு மாநிலங்களில் அதிரடி மாற்றங்களைச் செய்யத் திட்டமிட்டுள்ளது. 

குறிப்பாக, தமிழ்நாடு உள்ளிட்ட முக்கிய மாநிலங்களில் புதிய தலைவர்களை நியமிப்பது குறித்து காங்கிரஸ் கட்சியின் மூத்த தலைவர்கள் மற்றும் மேலிடப் பார்வையாளர்கள் டெல்லியில் தொடர்ந்து ஆலோசனைகளை மேற்கொண்டு வருகின்றனர். 

திமுக தலைமையிலான கூட்டணியில் இருந்து காங்கிரஸ் வெளியேறி உள்ள நிலையில் , வரும் காலங்களில் கட்சியின் தனித்துவத்தையும், களப் பணிகளையும் மேலும் தீவிரப்படுத்த ஒரு துடிப்பான மற்றும் டெல்லி மேலிடத்திற்கு நெருக்கமான தலைவரை நியமிக்க கட்சித் தலைமை விரும்புவதாக அரசியல் வட்டாரங்கள் தெரிவிக்கின்றன.

தமிழக காங்கிரஸ் தலைவர் பதவிக்கான தற்போதைய பரிசீலனைப் பட்டியலில் பல மூத்த தலைவர்களின் பெயர்கள் அடிபட்டாலும், நாடாளுமன்ற உறுப்பினர் மாணிக்கம் தாகூரின் பெயர் முன்வரிசையில் இருப்பதாகத் தெரியவந்துள்ளது.

விருதுநகர் தொகுதியில் இருந்து தொடர்ந்து நாடாளுமன்ற உறுப்பினராகத் தேர்வு செய்யப்பட்டு செயல்பட்டு வரும் இவர், காங்கிரஸ் கட்சியின் முன்னாள் தலைவர் ராகுல் காந்திக்கு மிக நெருக்கமானவராகக் கருதப்படுகிறார். கட்சியின் அகில இந்திய செயலாளராகவும், பல்வேறு மாநிலங்களின் தேர்தல் பொறுப்பாளராகவும் பணியாற்றிய அனுபவம் இவருக்கு உண்டு. கட்சியின் அடிமட்டத் தொண்டர்கள் முதல் டெல்லி மேலிடம் வரை நல்ல நற்பெயரைக் கொண்டிருப்பதால், இவருக்கு இந்த வாய்ப்பு வழங்கப்படலாம் எனத் தெரிகிறது.

அடுத்தக்கட்ட நகர்வு என்ன?

தற்போது தமிழக காங்கிரஸ் தலைவராக இருக்கும் செல்வப்பெருந்தகையின் பதவிக்காலம் மற்றும் கட்சியின் எதிர்கால வியூகங்களை மனதில் வைத்தே இந்த மாற்றங்கள் விவாதிக்கப்பட்டு வருகின்றன. டெல்லியில் நடைபெறும் இந்த ஆலோசனைக் கூட்டங்களின் முடிவில், காங்கிரஸ் தலைவர் மல்லிகார்ஜுன கார்கே மற்றும் ராகுல் காந்தி ஆகியோரின் ஒப்புதலுடன் புதிய தலைவர்கள் குறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.