நெருங்குதலும் விலகலும்

- மொழிப்பித்தன் இரா.ச.குமார்

நானோ நெருங்குகிறேன்                  

நீயோ விலகுகிறாய்

சரி

நெருங்குவதை கைவிடுகிறேன்

நீ விலகலை விட்டு தொலை...

--

காற்று கை வீசி நடக்குமளவு

நமக்கிடையே

ஒரு இடைவெளி

எப்போதும் இருக்கட்டுமென

நிபந்தனையற்ற 

ஒப்பந்தம் ஒன்றை எழுதலாமா?..

--

நான் நெருங்குவது

நீ விலகுவது தொடர்கதையானால்

முடிவென்பதுதான் எப்போது?..

--

வேலை வெட்டியற்ற முற்றுப்புள்ளி ஒன்று

வெட்டியாய்

என் சொற்களோரம் கிடக்கிறது...

--

அந்த 

ஒற்றை முற்றுப்புள்ளி

தன்னை

பயன்படுத்தி சொல்லி

இடையூறாகிறது சொற்களுக்கு மத்தியிலே நின்று...

--

ஒட்டி உரசுமளவு

கூட வேண்டாம்

அது

தேவைப்படுவதுமில்லை

சற்று ஒரு இடைவெளிவிட்டு நெருங்கேன்

உன் மூச்சுக்காற்றின்

வெப்பத்தை

நான் உணருமளவிலான

தூரத்தில்...

--

நான் முடிவுரையெழுதி

முற்றுப்புள்ளியிட்டு

முடிக்க முடிவு செய்கிறேன்

நீயோ தொடருமென               

தயங்கி தயங்கி

இடுகிறாய் அரைப்புள்ளி...

--

இந்த புள்ளிகளை தூக்கியெறிவதா

இருந்து தொலைகிறதென

இருப்பில் வைக்கவா?..

--

விலகலை கை விடு

புள்ளிகளை பயன்படுத்தி

முற்றும் போடுகிறேன்

எழுதும் 

இந்த கவிதைக்கு...

--

முற்றுமென முடிந்தது

இனி

எந்த புள்ளிக்கும் இங்கு இடமிருக்காது

இன்னொரு கவிதை எழுதும் வரை...