மயக்கமடைந்தது போல நடித்து.. நரகாசுரனை வதம் செய்த ஸ்ரீகிருஷ்ணர்!

- ஈரோடு மாலதி

தீபாவளி பண்டிகை கொண்டாட்டத்திற்குப் பின்னால் பல புராணக் கதைகள் உள்ளன. பொதுவாக, வட இந்தியாவில் இது ராமன் சீதை மற்றும் லட்சுமணனுடன் அயோத்திக்குத் திரும்பிய நாளைக் குறிக்கிறது. ஆனால், தமிழ்நாடு மற்றும் தென்னிந்தியாவில் தீபாவளி என்றாலே நரகாசுர வதம் தான் முக்கியக் கதையாகக் கருதப்படுகிறது.

பிராக்ஜோதிஷபுரம் என்ற பகுதியை ஆண்டு வந்த அசுரன் நரகாசுரன், தேவர்களுக்கும் முனிவர்களுக்கும் பெண்களுக்கும் பெரும் துன்பம் விளைவித்து வந்தான். அவனது அகம்பாவம் எல்லை மீறியபோது, தேவர்களும் பூமாதேவியும் மகாவிஷ்ணுவிடம் முறையிட்டனர்.

நரகாசுரன் தன் தாயின் கையால் மட்டுமே மடிய வேண்டும் என்ற வரத்தைப் பெற்றிருந்தான். இதனால் விஷ்ணு பகவான் கிருஷ்ணராக அவதாரம் எடுத்தபோது, பூமாதேவியின் அவதாரமான அவரது மனைவி சத்யபாமா நரகாசுரனுடன் போரிடக் கூடவேச் சென்றார்.

போரின் ஒரு கட்டத்தில் கிருஷ்ணர் மயக்கமடைந்தது போல் நடிக்க, கோபமுற்ற சத்யபாமா வில்லை எடுத்து நரகாசுரனை வதம் செய்தார்.

இறக்கும் தருவாயில், நரகாசுரன் தான் செய்த தவறை உணர்ந்து கிருஷ்ணரிடம் ஒரு வரம் கேட்டான்: "நான் இறந்த இந்த நாளை மக்கள் அனைவரும் சோகமாகக் கருதாமல், புத்தாடைகள் அணிந்து, பட்டாசுகள் வெடித்து, எண்ணெய் தேய்த்துக் குளித்து மகிழ்ச்சியாகக் கொண்டாட வேண்டும்" என்று வேண்டினான். அவனது வேண்டுதலை ஏற்று, அந்த நாளை மக்கள் தீபாவளியாகக் கொண்டாடும்படி கிருஷ்ணர் வரமளித்தார்.

இதேபோன்று, தமிழ்நாட்டில் தீபாவளி அன்று அதிகாலையில் கங்கா ஸ்நானம் (எண்ணெய் தேய்த்துக் குளிப்பது) செய்யும் ஐதீகம் மிகவும் பிரபலமானது. அன்று அனைத்து நீரும் கங்கா நதிக்குச் சமம் என்பது நம்பிக்கை. மேலும், தீபாவளி பலகாரங்களைச் செரிமானம் செய்ய நரகாசுரனின் மறைவைக் குறிக்கும் வகையில் தீபாவளி லேகியம் (மருந்து) சாப்பிடும் பாரம்பரியமும் தமிழ்நாட்டில் காலங்காலமாகப் பின்பற்றப்பட்டு வருகிறது.

தீபாவளி பண்டிகையை உங்கள் குடும்பத்தினருடன் மிகவும் மகிழ்ச்சியாகக் கொண்டாடுங்கள். உங்களுக்கு அட்வான்ஸ் தீபாவளி நல்வாழ்த்துகள்!

(கட்டுரையாளர் மாலதி, நசியனூர், நெசவாளர் காலனி, சிந்தன்கோட்டை, எம்ஜிஆர் ரோடு, ஈரோடு)