கேளாக் கடனும் கெடும்.. கேட்பின் உறவும் கெடும்.. அவ்வையின் 60 ஆத்தி சூடி மொழிகள் (2)

- கவிக்கடல் அ.ல.ஏகலைவன்

நேரிசை வெண்பாவில் அவ்வையின் 60 ஆத்தி சூடி மொழிகளை நாம் விளக்கத்துடன் பார்க்கப் போகிறோம். நமக்காக இந்த விளக்கத்துடன் கூடிய அவ்வையின் மொழிகளை தொகுத்தளிக்கிறார் கவிக்கடல் அ.ல.ஏகலைவன். இன்று அடுத்த இரு பாடல்களைப் பார்க்கலாம்.

கேட்டுக் கொடுத்தலில் கேண்மைப் புரிதலாகும்

ஈட்ட அதனை இயம்பிடல்- தேட்டமாகும் 

வாளா இராது வழுவுடன் கேட்பதல்லால்

கேளாக் கடனும் கெடும்

ஈட்டும் இனிமை இரவாதி ருக்கவே 

கூட்டுரைக்கும் சொல்லிலும் கொள்கையைக் -காட்டிடல்

தேட்டத்தின் செல்வங்கள் தேடியீவார் அவ்வாறே

கேட்பின் உறவும் கெடும்

விளக்க உரை

இல்லையென்று வருவோருக்கு வாழ்வியலுக்காக வேண்டி கேட்கும் கடன் தொகையை கொடுத்து உதவுவது சிறப்பாகும். அதேசமயம் அக்கடனை உரிய நேரத்தில் கேட்டு பெறுவதே உயரிய பண்பாகும் ; அவ்வாறு கேட்காமல் இருந்தால் அக்கடனும் இல்லை என்ற சொல்லில் விழுந்துகெடும் .

அதுபோலவே சேர்க்கும் செல்வங்கள் கொடுத்து உதவுவதற்காகவே ;கொடுத்த பின் காட்டும் அன்பு மேலானது கண்ணியத்திற்குரியது. ஆனால் கொடுத்தது கேட்பின் அடுத்தது பகை என்பது போல நாம் செய்த உதவியை திருப்பி கேட்டால் அந்த உறவும் கெட்டுவிடும்.

(மதிப்புறுமுனைவர் கவிக்கடல் அ.ல.ஏகலைவன், கிராம நூலகர், பிடாகம் ஊராட்சி, எலவனாசூர்கோட்டை, கள்ளக்குறிச்சி மாவட்டம்)