ரூ.14.20 கோடி கார்த்திக் சர்மா.. பொசுக்கென்று ஜோலியை முடித்த ரூ. 30 லட்சம்!

குவஹாத்தி: சென்னை சூப்பர் கிங்ஸ் அணிக்கு எதிரான போட்டியில் ராஜஸ்தான் ராயல்ஸ் பவுலர் பிரிஜேஷ் சர்மா ஒரு அதிரடியைக் காட்டினார்.

2026 ஐபிஎல் ஏலத்தில் சென்னை சூப்பர் கிங்ஸ் அணியால் மிகப்பெரிய விலைக்கு வாங்கப்பட்ட இளம் வீரர் கார்த்திக் சர்மாவை அட்டகாசமாக வீழ்த்தி அசத்தி விட்டார் பிரிஜேஷ் சர்மா. இதில் என்ன வேடிக்கை என்றால் ஜஸ்ட் 30 லட்சம் ரூபாய்க்கு ஏலத்தில் எடுக்கப்பட்டவர் பிரிஜேஷ் என்பதுதான்.

தனது அறிமுகப் போட்டியிலேயே ரசிகர்களை ஏமாற்றி விட்டார் கார்த்திக் சர்மா. ராஜஸ்தான் ராயல்ஸ் அணிக்கு எதிரான இன்றைய ஆட்டத்தில் அவர் 18 ரன்களில் (15 பந்துகள்) ஆட்டமிழந்தார்.

டிசம்பரில் நடந்த ஏலத்தில் யாரும் எதிர்பாராத விதமாக ரூ. 14.2 கோடிக்கு ஒப்பந்தம் செய்யப்பட்ட இந்த 19 வயது விக்கெட் கீப்பர் பேட்ஸ்மேன் மீது பெரும் எதிர்பார்ப்பு நிலவியது. 37 ரன்களுக்கே 4 விக்கெட்டுகளை இழந்து சிஎஸ்கே தடுமாறிய போது களமிறங்கிய கார்த்திக், ரவி பிஷ்னோய் பந்துவீச்சில் ஒரு சிக்ஸர் அடித்து நம்பிக்கையளித்தார். ஆனால், பிரிஜேஷ் சர்மா வீசிய பந்தில் எல்பிடபிள்யூ முறையில் ஆட்டமிழந்து வெளியேறினார்.

உள்நாட்டுப் போட்டிகளில் (ரஞ்சி மற்றும் விஜய் ஹசாரே கோப்பை) அதிக சிக்ஸர்களை விளாசி அசத்தியவர்தான் கார்த்திக் சர்மா. இதன் காரணமாகவே, ஐபிஎல் வரலாற்றில் அதிக விலைக்கு வாங்கப்பட்ட அன்கேப்டு இந்திய வீரர்களில் ஒருவராக இவர் உருவெடுத்தார்.

தற்போது எம்.எஸ்.தோனி காயம் காரணமாக அணியில் இல்லாத நிலையில், கார்த்திக் சர்மா போன்ற இளம் வீரர்கள் சிறப்பாக விளையாடினால் மட்டுமே சிஎஸ்கே மீண்டெழ முடியும். வரும் ஏப்ரல் 3-ம் தேதி பஞ்சாப் கிங்ஸ் அணிக்கு எதிரான அடுத்த போட்டியில் கார்த்திக் தனது திறமையை நிரூபிப்பார் என ரசிகர்கள் எதிர்பார்க்கின்றனர்.

இதுபோல காஸ்ட்லியான வீரர்கள் சொதப்புவதும், சாதாரண வீரர்கள் அசத்துவதும் ஐபிஎல்லில் தொடர்ந்து நடப்பதுதான். அந்த வகையில் இன்றைய நிகழ்வும் ரசிகர்களிடையே கலகலப்பை ஏற்படுத்தி விட்டது.

முன்னதாக முதலில் பேட்டிங் செய்த சென்னை அணி 19.4 ஓவர்களில் அனைத்து விக்கெட்டுகளையும் இழந்து 127 ரன்கள் மட்டுமே எடுத்தது. சிஎஸ்கே அணியில் அதிகபட்சமாக ஜேமி ஓவர்டன் 36 பந்துகளில் 43 ரன்கள் எடுத்து அணியின் ஸ்கோர் 120 கடக்க உதவினார்.

ராஜஸ்தான் அணிக்காக விளையாடிய சிஎஸ்கே-வின் முன்னாள் ஜாம்பவான் ரவீந்திர ஜடேஜா, 3 ஓவர்களில் 18 ரன்கள் மட்டுமே கொடுத்து 2 விக்கெட்டுகளை வீழ்த்தினார்.