சென்னை: ஐபிஎல் 2026 தொடரில் சென்னை சூப்பர் கிங்ஸ் அணி இன்று ஒரு புதிய வரலாற்றை எழுதியுள்ளது. கடந்த 17 ஆண்டுகளில் இல்லாத வகையில், எம்.எஸ்.தோனி மற்றும் சுரேஷ் ரெய்னா ஆகிய இருவருமே இல்லாமல் சிஎஸ்கே களமிறங்கிய முதல் போட்டியாக குவஹாத்தி போட்டி அமைந்துள்ளது.

இதுவரை ஆடிய சிஎஸ்கே போட்டிகளில் தோனி அல்லது ரெய்னா ஆகியோரில் யாராவது ஒருவர் இருந்து வந்தனர். சுரேஷ் ரெய்னா போன பிறகும் கூட இது தொடர்ந்து வந்தது. ஆனால் இன்றைய போட்டியில் தோனியும் இடம் பெறவில்லை.

சிஎஸ்கே அணி இதுவரை விளையாடிய 277 டி20 போட்டிகளில் அதாவது ஐபிஎல் மற்றும் சாம்பியன்ஸ் லீக் சேர்த்து, குறைந்தது தோனி அல்லது ரெய்னா ஆகிய இருவரில் ஒருவர் நிச்சயமாக ஆடும் லெவனில் இடம் பெற்றிருப்பார்கள். இன்று ராஜஸ்தான் ராயல்ஸ் அணிக்கு எதிரான போட்டியில் இந்த நீண்ட கால பாரம்பரியம் முடிவுக்கு வந்துள்ளது.

தோனி ஏன் விளையாடவில்லை?

தோனிக்கு பயிற்சியின் போது தசைப்பிடிப்பு ஏற்பட்டதால், இந்த சீசனின் முதல் இரண்டு வாரங்களுக்கு அவர் விளையாட மாட்டார் என்று சிஎஸ்கே நிர்வாகம் அதிகாரப்பூர்வமாக அறிவித்துள்ளது. சுரேஷ் ரெய்னா ஏற்கனவே ஓய்வு பெற்றுவிட்ட நிலையில், தோனியின் இந்த காயம் ரசிகர்களுக்குப் பெரும் ஏமாற்றத்தைத் தந்துள்ளது.

ருதுராஜ் கெய்க்வாட் அணியை வழிநடத்த, தோனிக்கு பதிலாக விக்கெட் கீப்பிங் பொறுப்பை ராஜஸ்தான் அணியில் இருந்து மாற்றப்பட்ட சஞ்சு சாம்சன் ஏற்றுள்ளார்.

குவஹாத்தியில் நடைபெற்று வரும் இந்த ஆட்டத்தில், டாஸ் வென்ற ராஜஸ்தான் அணி பந்துவீச்சைத் தேர்வு செய்தது. தோனி இல்லாத நிலையில் களமிறங்கிய சிஎஸ்கே அணிக்கு ஆரம்பமே அதிர்ச்சியாக அமைந்தது. சஞ்சு சாம்சன், ருதுராஜ் கெய்க்வாட் மற்றும் ஆயுஷ் மத்ரே ஆகியோர் சொற்ப ரன்களில் ஆட்டமிழக்க, பவர்பிளே ஓவர்களிலேயே சிஎஸ்கே தடுமாறியது.

தற்போது சர்பராஸ் கான் அதிரடியாக விளையாடி அணியை மீட்கப் போராடி வருகிறார். 'தல' மற்றும் 'சின்ன தல' இல்லாத சிஎஸ்கே அணியை முதன்முதலாகப் பார்ப்பது ரசிகர்களுக்கு ஒரு விசித்திரமான உணர்வைத் தந்துள்ளது.