மதுராந்தகம், தாராபுரம் இடைத்தேர்தல் 2026: தவெக, திமுக வேட்புமனுக்கள் ஏற்பு

சென்னை : தமிழ்நாட்டில் காலியாக உள்ள மதுராந்தகம் மற்றும் தாராபுரம் சட்டமன்றத் தொகுதிகளுக்கான இடைத்தேர்தல் களம் தற்பொழுது சூடுபிடிக்கத் தொடங்கியுள்ளது. தேர்தல் ஆணையத்தின் அறிவிப்பின்படி, இரு தொகுதிகளிலும் போட்டியிடுவதற்காகத் தாக்கல் செய்யப்பட்ட வேட்புமனுக்கள் மீதான பரிசீலனை இன்று (செப்டம்பர் 17, 2026) நடைபெற்று வருகிறது.

தாக்கல் செய்யப்பட்ட வேட்புமனுக்கள் விவரம் :

மதுராந்தகம், தாராபுரம் ஆகிய தொகுதிகளுக்கு அக்டோபர் 06ம் தேதி இடைத்தேர்தல் நடைபெற உள்ளது. தேர்தலில் போட்டியிட விரும்பும் வேட்பாளர்கள் வேட்புமனு தாக்கல் செய்வதற்கான அவகாசம் நிறைவடைந்த நிலையில், இரு தொகுதிகளிலும் ஏராளமான சுயேச்சைகள் மற்றும் அங்கீகரிக்கப்பட்ட அரசியல் கட்சி வேட்பாளர்கள் மனு தாக்கல் செய்துள்ளனர்.

மதுராந்தகம் சட்டமன்றத் தொகுதியில் மொத்தம் 49 வேட்புமனுக்கள் தாக்கல் செய்யப்பட்டுள்ளன.

தாராபுரம் சட்டமன்றத் தொகுதியில் மொத்தம் 51 வேட்புமனுக்கள் தாக்கல் செய்யப்பட்டுள்ளன.

இரண்டு தொகுதிகளையும் சேர்த்து மொத்தம் 100 வேட்புமனுக்கள் பெறப்பட்டுள்ளன.

வேட்புமனுக்கள் பரிசீலனை :

தேர்தல் நடத்தும் அலுவலர்கள் முன்னிலையில், வேட்பாளர்களின் முகவர்கள் மற்றும் வழக்கறிஞர்கள் பங்கேற்புடன் இன்று காலை முதல் வேட்புமனுக்கள் மீதான கூர்ந்தாய்வு (Scrutiny) தீவிரமாக நடைபெற்று வருகிறது. வேட்புமனுக்களில் உள்ள தகவல்கள், சொத்து விவரங்கள், வழக்கு குறித்த விபரங்கள் மற்றும் உரிய ஆவணங்கள் சரியாகச் சமர்ப்பிக்கப்பட்டுள்ளவா என அலுவலர்கள் சரிபார்த்து வருகின்றனர். தகுதியற்ற மற்றும் அரைகுறையாகப் பூர்த்தி செய்யப்பட்ட மனுக்கள் தள்ளுபடி செய்யப்பட வாய்ப்புள்ளது.

வேட்புமனுக்கள் ஏற்பு : 

மதுராந்தகம் இடைத்தேர்தலில் போட்டியிடும் திமுக, தவெக, சிபிஎம், நாதக ஆகிய கட்சிகளின் வேட்பாளர்களின் வேட்புமனுக்கள் ஏற்கப்பட்டுள்ளதாக தேர்தல் கமிஷன் அறிவித்துள்ளது.

வேட்புமனுக்களைத் திரும்பப் பெற நாளை கடைசி நாள் :

வேட்புமனுக்கள் பரிசீலனை நிறைவடைந்த பிறகு, தகுதியான வேட்பாளர்களின் பட்டியல் வெளியிடப்படும். அதனைத் தொடர்ந்து, தேர்தலில் போட்டியிட விரும்பாத வேட்பாளர்கள் அல்லது தங்களது மனுக்களைத் திரும்பப் பெற நினைப்பவர்களுக்கு நாளை (18.09.2026) கடைசி நாளாகும். நாளை மாலை வேட்புமனு திரும்பப் பெறும் நேரம் நிறைவடைந்ததும், களத்தில் நிற்கும் இறுதி வேட்பாளர்களின் பட்டியல் மற்றும் அவர்களுக்கான தேர்தல் சின்னங்கள் அதிகாரப்பூர்வமாகத் தேர்தல் ஆணையத்தால் அறிவிக்கப்படும்.

தேர்தல் களம் தீவிரமடைகிறது :

முக்கிய அரசியல் கட்சிகளின் வேட்பாளர்களுடன் சுயேச்சை வேட்பாளர்களும் பெருமளவில் மனு தாக்கல் செய்துள்ளதால், மதுராந்தகம் மற்றும் தாராபுரம் ஆகிய இரு தொகுதிகளிலும் தேர்தல் பிரச்சாரமும், இறுதி வேட்பாளர் பட்டியல் குறித்த எதிர்பார்ப்பும் உச்சக்கட்டத்தை எட்டியுள்ளது. பாதுகாப்புப் பணிகளும் அந்தந்த மாவட்ட நிர்வாகங்களால் பலப்படுத்தப்பட்டுள்ளன.