நீயும் கவிஞனே!

- மொழிப்பித்தன் இரா.ச.குமார்

கொஞ்சமாய் எதார்த்தம்

நிறைய கற்பனை 

தேவைக்கேற்ப வர்ணனை

இவ்வளவே 

இந்த

எளிய சமன்பாடே கவிதை...

--

சுருக்கி எழுதுவதிலென்ன

சுவாரஸ்யம்

சற்றே நீளமாக்கு...

--

மாதிரிக்கு ஒன்று

நீள இரவென்பதை

நீளமான இரவெனலாம்...

--

தூறலென எழுது

தோன்றி மறையும் மின்னலை கட்டமை

மழைச் சூழலை விவரி

கருமுகிலென எழுது

இறுதி வரிக்குள்

ஆகாயத்தையே பிளக்கும் 

அந்த இடியையும் இறக்கு...

--

அத்தியாயங்களை பத்திகளாக்கு

வார்த்தைகளை 

துண்டாடு

சொல்ல வந்ததை

வரிகள் வழி விளக்கு...

--

எதுவும் கவிதையாகலாம்

இங்கே

எந்த சொல் வீண்?

கண்டதை கவிதைக்குள் துருத்து

வார்த்தை செய்

வரி வரியாய் பிரி...

--

விமர்சிக்கப்படுகிறாயா? 

நீ அங்கீகரிக்கப்படுகிறாயென பொருள்

விமர்சித்தமைக்கு

நன்றி சொல்

இனி

எழுது எழுது

தொடர்ந்து எழுது

ஒப்புக்கொள்ளப்படுவாய் 

ஆக

நீயும் கவிஞனே...