ஐகோர்டில் வழக்காடு மொழியாக தமிழ்...முதல்வரின் தனித்தீர்மானத்திற்கு அனைத்து கட்சிகளும் ஆதரவு

சென்னை : தமிழ்நாட்டின் ஆட்சி மொழியான தமிழை உயர் நீதிமன்றத்தின் வழக்காடு மொழியாகவும், முதன்மை மொழியாகவும் அறிவிக்க வலியுறுத்தி தமிழகச் சட்டப்பேரவையில் சிறப்புத் தனித்தீர்மானம் கொண்டு வரப்பட்டது. இத்தீர்மானத்தின் மீது உரை நிகழ்த்திய தமிழக முதல்வர் விஜய், தமிழ் மொழியின் முக்கியத்துவம் குறித்தும், அதன் சட்டப்பூர்வ பயன்பாடுகள் குறித்தும் உணர்வுப்பூர்வமாகப் பேசினார்.

உயிரோடும் உணர்வோடும் கலந்த மொழி :

சட்டமன்றத்தில் பேசிய முதல்வர் விஜய், "தமிழ் என்று கூறினாலே நமக்குள்ளே ஒரு தனி வேகமும் எழுச்சியும் பிறக்கிறது. தமிழ் என்பது வெறும் தகவல் தொடர்புக்கான மொழி மட்டுமல்ல; அது நமது உயிரோடும் உணர்வோடும் பிணைக்கப்பட்ட ஒன்றாகும்" எனக் குறிப்பிட்டார். சிறப்புமிக்க தமிழ் மொழியானது ஏற்கனவே ஆட்சித்துறை, கல்வியியல் மற்றும் மாவட்ட நீதிமன்றங்களில் விரிவாகப் பயன்படுத்தப்பட்டு வருகிறது. குறிப்பிட்ட ஆட்சிப் பணிகளுக்கும், நிர்வாக நடவடிக்கைகளுக்கும் தமிழைப் பயன்படுத்துவதற்கு நடைமுறையில் இருக்கும் சட்டங்கள் முழு அனுமதி வழங்குகின்றன என்பதையும் அவர் சுட்டிக்காட்டினார்.

சென்னை உயர் நீதிமன்றத்தில் தமிழின் தேவை

சென்னை உயர் நீதிமன்ற நடவடிக்கைகளில் தமிழை முதன்மை மொழியாக அதிகாரப்பூர்வமாக அறிவிப்பது தற்காலத்தின் மிக முக்கியமான கட்டாயமாகும். ஒரு மாநிலத்தின் ஆட்சி மொழியை, அம்மாநிலத்தின் உயர் நீதிமன்ற வழக்கு விசாரணைகளிலும் நடைமுறைகளிலும் பயன்படுத்துவதற்கான அதிகாரத்தை வழங்க சட்டத்தில் வழியிருக்கிறது. மேலும், உயர் நீதிமன்றத் தீர்ப்புகள், இடைக்கால உத்தரவுகள் மற்றும் தீர்ப்பாணைகளைத் தமிழில் வழங்கவும் சட்டம் அனுமதிக்கிறது. சாமானிய மக்களும் நீதிமன்றத் தீர்ப்புகளையும் சட்ட நடவடிக்கைகளையும் தங்களின் தாய்மொழியிலேயே எளிதாகப் புரிந்துகொள்ள இது வழிவகுக்கும்.

மக்களுக்கான நீதித்துறை அணுகல்

சாதாரண மக்களுக்கு நீதி விரைவாகவும், தடங்கலின்றியும் சென்றடைய வேண்டுமெனில், நீதிமன்ற மொழியாகத் தமிழ் இருப்பது அவசியம் என்பதால், இந்தத் தனித்தீர்மானம் கொண்டு வரப்பட்டுள்ளது. மாநிலத்தின் உயர் நீதிமன்றத்தில் அன்னைத் தமிழ் அரியணை ஏற மத்திய அரசும், நீதித்துறையும் உரிய நடவடிக்கை எடுக்க வேண்டும் என்பதே இந்தத் தீர்மானத்தின் முக்கிய நோக்கமாகும். நீதிமன்றங்களில் தாய்மொழியின் பயன்பாட்டை அதிகரிப்பது, மக்களுக்கும் நீதித்துறைக்குமான இடைவெளியைக் குறைக்கும் என்று சட்ட வல்லுநர்களும், அனைத்துக் கட்சி உறுப்பினர்களும் இத்தீர்மானத்திற்குத் தங்களது ஆதரவை தெரிவித்து வருகின்றனர்.

அனைத்து கட்சிகளும் ஆதரவு :

தமிழை அலுவல் மொழியாக்க வேண்டும் என முதல்வர் விஜய் கொண்டு வந்த சிறப்பு தனித் தீர்மானத்திற்கு திமுக, பாமக, அதிமுக, கம்யூனிஸ்ட் உள்ளிட்ட சட்டசபையில் உள்ள அனைத்து கட்சிகளும் ஆதரவும், வரவேற்பும் தெரிவித்துள்ளன