சென்னை: தமிழ் சினிமாவின் உச்ச நட்சத்திரமான சூப்பர்ஸ்டார் ரஜினிகாந்த் நடிப்பில் உருவாகவுள்ள அவரது 173-வது திரைப்படத்தின் அதிகாரப்பூர்வ தலைப்பு மற்றும் ஃபர்ஸ்ட் லுக் போஸ்டர் இன்று (ஜூன் 24, 2026) வெளியிடப்பட்டுள்ளது. இந்தத் திரைப்படத்திற்கு ‘தர்மன்’ (Dharman) என்று பெயரிடப்பட்டுள்ளது.

பெரும் எதிர்பார்ப்புகளுக்கு மத்தியில் வெளியாகியுள்ள இத்திரைப்படத்தின் ஃபர்ஸ்ட் லுக் போஸ்டர், தற்பொழுது சமூக வலைதளங்களில் காட்டுத்தீ போல பரவி வைரலாகி வருகிறது.

இயக்குநர் அஸ்வத் மாரிமுத்து

‘ஓ மை கடவுளே’ மற்றும் பிரதீப் ரங்கநாதன் நடிப்பில் உருவான ‘டிராகன்’ ஆகிய படங்களின் மூலம் கவனம் ஈர்த்த இளம் இயக்குநர் அஸ்வத் மாரிமுத்து இத்திரைப்படத்தை இயக்குகிறார். உலகநாயகன் கமல்ஹாசனின் முன்னணி தயாரிப்பு நிறுவனமான ‘ராஜ் கமல் ஃபிலிம்ஸ் இன்டர்நேஷனல்’ மற்றும் மகேந்திரன் இணைந்து பிரம்மாண்டமான முறையில் இத்திரைப்படத்தைத் தயாரிக்கின்றனர். 

ரஜினிகாந்த் - கமல்ஹாசன் - அஸ்வத் மாரிமுத்து ஆகியோரின் இந்த மெகா கூட்டணி, ரசிகர்களிடையே படத்திற்கான எதிர்பார்ப்பை இரட்டிப்பாக்கியுள்ளது.

மருத்துவராக நடிக்கும் ரஜினிகாந்த்:

வெளியாகியுள்ள தகவல்களின்படி, ‘தர்மன்’ திரைப்படத்தில் சூப்பர்ஸ்டார் ரஜினிகாந்த் ஒரு மருத்துவர் கதாபாத்திரத்தில் நடிக்கவுள்ளதாகக் கூறப்படுகிறது. வழக்கமான ஆக்ஷன் மற்றும் மாஸ் மசாலா பாணியில் இருந்து மாறுபட்டு, ரஜினிகாந்தின் நடிப்புத் திறனுக்குத் தீனி போடும் வகையில் இந்தத் தனித்துவமான கதாபாத்திரம் வடிவமைக்கப்பட்டுள்ளதாகத் தெரிகிறது.

நட்சத்திர பட்டாளம் மற்றும் தொழில்நுட்பக் குழு:

இத்திரைப்படத்தில் ரஜினிகாந்துடன் இணைந்து முன்னணி நடிகர்களான சிம்ரன், ராஷி கண்ணா மற்றும் நகைச்சுவை நடிகர் யோகி பாபு ஆகியோர் முக்கிய கதாபாத்திரங்களில் நடிக்கின்றனர்.

படத்தின் தொழில்நுட்பக் குழுவும் மிகவும் வலுவானதாக அமைந்துள்ளது. ரஜினிகாந்தின் பல பிளாக்பஸ்டர் படங்களுக்குப் பின்னணி இசை அமைத்த அனிருத் ரவிச்சந்தர் இத்திரைப்படத்திற்கும் இசையமைக்கிறார். பிரபல சண்டைப் பயிற்சி இயக்குநர்களான அன்பறிவ் மாஸ்டர்கள் அதிரடி ஆக்ஷன் காட்சிகளை வடிவமைக்கின்றனர். நிகேத் பொம்மிரெட்டி ஒளிப்பதிவு செய்ய, பிரதீப் ஈ. ராகவ் படத்தொகுப்பு (Editing) பணிகளை மேற்கொள்கிறார். கார்த்திக் ராஜ்குமார் கலை இயக்குநராகப் பணியாற்றுகிறார்.

ரசிகர்கள் கொண்டாட்டம்:

ராஜ் கமல் ஃபிலிம்ஸ் இன்டர்நேஷனல் நிறுவனம் இன்று காலை படத்தின் ஃபர்ஸ்ட் லுக் போஸ்டரைத் தனது அதிகாரப்பூர்வ எக்ஸ் (ட்விட்டர்) பக்கத்தில் பகிர்ந்த உடனே, #Dharman, #Thalaivar173 போன்ற ஹேஷ்டேக்குகள் இந்திய அளவில் ட்ரெண்ட் ஆகத் தொடங்கின. 

சூப்பர்ஸ்டாரின் 173-வது படமான ‘தர்மன்’, அவரது திரைப்பயணத்தில் மற்றொரு மைல்கல்லாக அமையும் என்று சினிமா விமர்சகர்களும் ரசிகர்களும் தங்களது வாழ்த்துகளைத் தெரிவித்து வருகின்றனர். படத்தின் படப்பிடிப்பு மற்றும் இதர விவரங்கள் விரைவில் அடுத்தடுத்து வெளியாகும் என எதிர்பார்க்கப்படுகிறது.

ரஜினிக்கும், கமலுக்கும் தர்மன் என்ற பெயர் வெகு நெருக்கமானது. கமல்ஹாசனின் மிக நெருங்கிய நண்பராக இருந்தவர் மறைந்த ஸ்டண்ட் மாஸ்டர் விக்ரம் தர்மா.. அதேபோல ரஜினியின் மனதுக்கு நெருக்கமான படங்களில் ஒன்று தர்மதுரை. அந்த வகையில் தர்மன் என்ற பொதுவான பெயர் இந்த இரு நண்பர்களையும் இணைத்துள்ளது குறிப்பிடத்தக்கது.