சென்னை: தேமுதிக இன்று திமுக கூட்டணியில் இணைந்தது. தேமுதிக பொதுச் செயலாளர் பிரேமலதா விஜயகாந்த், அண்ணா அறிவாலயத்திற்கு வருகை தந்து முதல்வர் மு.க.ஸ்டாலினைச் சந்தித்து கூட்டணியில் இணைந்தார்.

திமுக கூட்டணிக்கு வருகை தந்துள்ள தேமுதிகவுக்கு ஒரு ராஜ்யசபா சீட் மற்றும் 6 அல்லது 8 சட்டசபைத் தொகுதிகளை தர திமுக முடிவு செய்திருப்பதாக கூறப்படுகிறது. எல்லாமே பேசி முடித்த பிறகே கூட்டணிக்கு தேமுதிக வந்துள்ளதாகவும் கூறப்படுகிறது. 

மறைந்த கேப்டன் விஜயகாந்த்தால் தொடங்கப்பட்ட கட்சி தேமுதிக. திமுகவை எதிர்த்து மிகக் கடுமையான போரே தொடுத்தவர் விஜயகாந்த். அதேபோல அதிமுகவையும் அவர் தொலைவிலேயே வைத்திருந்தார். 2 தேர்தல்களை தனித்து சந்தித்த அவர் பின்னர் காலத்தின் கோலமாக கூட்டணி அரசியலுக்கு மாறினார். அதிமுகவுடன் கூட்டணி வைத்து தேர்தலை சந்தித்து எதிர்க்கட்சி அந்தஸ்தைப் பெற்றார்.

ஆனால் அதன் பிறகு தேமுதிகவுக்கு இறங்குமுகம் ஏற்பட்டது. கட்சி உடைந்தது. படிப்படியாக செல்வாக்கையும் இழந்தது. விஜயகாந்த் பின்னர் பல்வேறு கூட்டணிகளுக்குள் பயணப்பட்டார். எந்த ஒரு வெற்றியையும் பல வருடங்களாக பெறாமல் இருந்து வந்தது தேமுதிக.

கடந்த சட்டசபைத் தேர்தலைஅதிமுக - பாஜக கூட்டணியில் இணைந்து சந்தித்தது . ஆனால் பெரும் தோல்விதான் கிடைத்தது. கடந்த நாடாளுமன்றத் தேர்தலில் அதிமுக கூட்டணியில் தேமுதிக இடம் பெற்றது. அதிலும் தோல்வியே கிடைத்தது. இந்த நிலையில் தற்போது கூட்டணியை மாற்றியுள்ளது தேமுதிக. முதல் முறையாக திமுக கூட்டணிக்கு வந்துள்ளது.

கலைஞர் கருணாநிதி உயிருடன் இருந்தபோது தேமுதிகவை தனது கூட்டணிக்கு கொண்டு வர ஆசைப்பட்டார். தீவிரமாகவும் முயன்றார். பழம் நழுவி வருகிறது. பாலில் விழும் என்று கூட நம்பிக்கையுடன் கூறியிருந்தார். ஆனால் ஜெயலலிதா முந்திக் கொண்டதால் தேமுதிக, அதிமுக கூட்டணிக்குப் போய் விட்டது. இந்த நிலையில் மு.க.ஸ்டாலின் தலைமையிலான திமுகவின் கூட்டணிக்கு தேமுதிக வந்து சேர்ந்துள்ளது.

தமிழ்நாட்டில் தேமுதிகவுக்கு ஒரு சதவீத அளவுக்குக் கூட தற்போது வாக்கு வங்கி இல்லை என்றாலும் கூட விஜயகாந்த் அனுதாபிகள், விஜயகாந்த் மீது பாசம் வைத்துள்ளோர் இன்னும் உள்ளனர். அவர்களின் ஆதரவை திமுக கூட்டணி பெற முடியும் என்று திமுக நம்புகிறது. 

கடந்த 2005ம் ஆண்டு தொடங்கப்பட்ட தேமுதிக தொடர்ந்து அதிமுக, பாஜக, மக்கள் நலக் கூட்டணி என்று பயணப்பட்ட நிலையில் முதல் முறையாக திமுக அரசியலுக்கு வந்துள்ளது பல்வேறு எதிர்பார்ப்புகளை ஏற்படுத்தியுள்ளது.