- ஈரோடு மாலதி

தமிழ் வரலாற்றில், அதுவும் குறிப்பாகச் சோழப் பேரரசின் வரலாற்றில் பொன்னெழுத்துகளால் பொறிக்கப்பட வேண்டிய ஒப்பற்ற பெயர் ‘செம்பியன் மாதேவி’. இவர் வெறும் அரச குடும்பத்துப் பெண்மணி மட்டுமல்லர்; சோழ நாட்டின் ஆன்மீக, சமூக, கலை மற்றும் கட்டிடக்கலை மறுமலர்ச்சிக்கு வித்திட்ட மாபெரும் சகாப்தம் ஆவர்.

சுமார் 1100 ஆண்டுகளுக்கு முன்பு, அதாவது கி.பி. பத்தாம் நூற்றாண்டில் வாழ்ந்த இப் பேரரசி, பெண் குலத்திற்கே பெருமை சேர்க்கும் வகையில் தன் வாழ்நாள் முழுவதையும் மக்கள் சேவைக்கும் ஆன்மீகப் பணிக்கும் அர்ப்பணித்தார்.

செம்பியன் மாதேவி சிற்றரசரான மழவரையர் குலத்தில் மகளாகப் பிறந்தவர். சோழப் பேரரசை வலுப்படுத்திய முதலாம் பராந்தக சோழனின் மகனான கண்டராதித்த சோழனை மணமுடித்தார். இவர்களது புதல்வரே பின்னாளில் சோழ அரியணையை அலங்கரித்த உத்தம சோழன் (மதுராந்தகன்) ஆவார். அதுமட்டுமின்றி, சோழ மண்டலத்தை உலகறியச் செய்த மாமன்னன் முதலாம் ராஜராஜ சோழனுக்குப் பாட்டியாக விளங்கி, அவருக்குச் சிறுவயதிலேயே ஆன்மீக உணர்வையும், கலை ஆர்வத்தையும், கொடைத் தன்மையையும் ஊட்டி வளர்த்த பெருமை செம்பியன் மாதேவியையே சாரும்.

ஒரு பெண்ணாக இருந்து, தனது வாழ்நாளில் ஆறு சோழ மன்னர்களின் ஆட்சிக் காலத்தைக் கண்டு, அவர்களுக்கு நல்வழிகாட்டியாகவும் ஆலோசகராகவும் திகழ்ந்தவர் செம்பியன் மாதேவி. முதலாம் பராந்தக சோழன், கண்டராதித்த சோழன், அரிஞ்சய சோழன், சுந்தர சோழன் (இரண்டாம் பராந்தகன்), உத்தம சோழன் மற்றும் முதலாம் ராஜராஜ சோழன் ஆகிய ஆறு மன்னர்களின் காலகட்டத்திலும் சோழ பேரரசின் வழிகாட்டி விளக்காக இவர் வீற்றிருந்தார். கணவர் கண்டராதித்தரின் மறைவுக்குப் பிறகும் மனம்தளராது, நாட்டிற்கும் இறைவனுக்கும் ஆற்ற வேண்டிய கடமைகளைத் தொடர்ந்து செய்தார்.

செம்பியன் மாதேவியின் மிக முக்கியமான வரலாற்றுப் பங்களிப்பு, அவர் செய்த திருக்கோயில் திருப்பணிகளாகும். அக்காலத்தில் மரத்தாலும் செங்கற்களாலும் கட்டப்பட்டிருந்த பழமையான சிவ ஆலயங்களைப் பிரித்து, அவை காலத்தால் அழியாதவாறு உறுதியான ‘கற்றளிகளாக’ (கருங்கல் அல்லது கிரானைட் கோயில்களாக) மாற்றி அமைத்தார்.

கோனேரிராஜபுரம் (திருநல்லம்), செம்பியன் மாதேவி, திருவாடுதுறை, விருத்தாசலம் உள்ளிட்ட பல தலங்களில் இவர் கற்றளிகளை எழுப்பினார். மேலும், சோழர் காலத்துச் செப்புத் திருமேனிகள் (வடிவமைக்கப்பட்ட வெண்கலச் சிலைகள்) வார்ப்பதில் புதிய சிகரத்தைத் தொட்டவர் இவர்.

இவரது பக்தியையும் சேவையையும் போற்றும் வகையில், மக்கள் இவரைப் பார்வதி தேவியின் அவதாரமாகவே கருதினர். கும்பகோணம் அருகில் உள்ள கோனேரிராஜபுரம் அருள்மிகு உமாமகேஸ்வரர் திருக்கோயிலில், செம்பியன் மாதேவி சிவபெருமானை வழிபாடு செய்யும் கோலத்தில் அமைந்த அபூர்வச் சிற்பம் ஒன்று உள்ளது. இதில் காதுகளில் குண்டலம், கழுத்தில் கண்டிகை மற்றும் சரப்பணி போன்ற ஆபரணங்களை அணிந்து, காலை மடித்து இறைவனை வணங்கும் தெய்வீக வடிவில் இச்சிலை செதுக்கப்பட்டுள்ளது.

மேலும், நாகப்பட்டினம் மாவட்டம் செம்பியன் மாதேவி கிராமத்தில் இருந்த இவரது புகழ்பெற்ற செப்புத் திருமேனி சிலை திருடப்பட்டு, அமெரிக்க அருங்காட்சியகத்தில் வைக்கப்பட்டது கண்டறியப்பட்டு, தற்போது அதை மீட்கும் முயற்சிகள் நடைபெற்று வருகின்றன.

ஆயிரத்து நூறு ஆண்டுகளுக்கு முன்பே ஒரு பெண்மணி தன் ஆற்றலாலும் ஆன்மீக பலத்தாலும் ஒரு பெரும் பேரரசின் வளர்ச்சிக்கு முதுகெலும்பாகத் திகழ்ந்துள்ளார் என்பது தமிழர்கள் அனைவரும் பெருமைப்பட வேண்டிய வரலாறாகும். ஆன்மீகம், கலை, பண்பாடு, மற்றும் நிர்வாகம் என அனைத்துத் துறைகளிலும் முத்திரை பதித்த செம்பியன் மாதேவியின் வரலாறு, சோழர் வரலாற்றில் என்றும் அழியாத ஒளிவிளக்காய் ஒளிர்கிறது.

(கட்டுரையாளர் மாலதி, நசியனூர், நெசவாளர் காலனி, சிந்தன்கோட்டை, எம்ஜிஆர் ரோடு, ஈரோடு)