தீரமும் வீரமும் செறிந்த.. விடுதலை முழக்கம்.. சுதந்திரக் காற்றை சுவாசிக்க இந்தியா கடந்து வந்த பாதை!

Aug 15, 2026,02:21 PM IST

"வந்தே மாதரம்" என்ற முழக்கம் இந்திய மண்ணின் மூலை முடுக்கெல்லாம் எதிரொலித்து, கோடிக்கணக்கான மக்களின் தியாகத்தால் சாத்தியமானதே இந்தியாவின் விடுதலை. அண்ணல் காந்தியடிகளின் அறவழிப் போராட்டங்கள், புரட்சியாளர்களின் ரத்த தியாகங்கள், தலைவர்களின் வழிகாட்டல்கள் எனப் பல கட்டப் போராட்டங்களைக் கடந்து 1947 ஆம் ஆண்டு ஆகஸ்ட் 15 ஆம் நாளில் இந்தியா விடுதலை பெற்றது. இந்திய விடுதலையின் வரலாற்றுப் பாதையைச் சற்றே திரும்பிப் பார்ப்போம்.

1857 - முதல் இந்திய விடுதலைப் போர். ஆங்கிலேயர்களின் அடக்குமுறைக்கு எதிராகப் வெடித்த சிப்பாய்க் கலகம், இந்திய விடுதலைப் போராட்டத்தின் முதல் பெருநெருப்பாகக் கருதப்படுகிறது.

1885 - இந்திய தேசிய காங்கிரஸ் பிறப்பு - மக்களின் கோரிக்கைகளை அமைதியான முறையில் ஆங்கிலேய அரசிடம் முன்வைக்க இந்திய தேசிய காங்கிரஸ் தொடங்கப்பட்டது.

1905 & 1906 - வங்கப் பிரிவினையும் சுதேசி இயக்கமும் - ஆங்கிலேயர்களின் "பிரித்து ஆளும் சூழ்ச்சிக்கு" உதாரணமாக வங்கப் பிரிவினை அமைந்தது. இதனைக் கண்டித்து அந்நியப் பொருட்களைப் புறக்கணிக்கும் சுதேசி இயக்கம் உருவெடுத்தது. இதே காலகட்டத்தில் (1906) முஸ்லிம் லீக் கட்சியும் தோற்றுவிக்கப்பட்டது.

1914-1918 & 1915 - முதல் உலகப் போர் நடைபெற்ற சூழலில், 1915 ஆம் ஆண்டு மகாத்மா காந்தி தென்னாப்பிரிக்காவில் இருந்து தாயகம் திரும்பினார். அவரது வருகை இந்திய விடுதலைப் போராட்டத்திற்கு ஒரு புதிய பரிமாணத்தையும் அறவழி வலிமையையும் தந்தது.

1919 - ஜாலியன் வாலாபாக் படுகொலை - கொடூரமான ரௌலட் சட்டத்திற்கு எதிராகப் போராடிய மக்கள் மீது நிகழ்த்தப்பட்ட ஜாலியன் வாலாபாக் படுகொலை, ஆங்கிலேய ஆட்சியின் கொடூர முகத்தை வெளிப்படுத்தியது.

AI Generated Image

1920 & 1922 - ஒத்துழையாமை இயக்கம் - காந்தியடிகளின் தலைமையில் ஒத்துழையாமை இயக்கம் தீவிரமடைந்தது. இருப்பினும், 1922-ல் நடைபெற்ற சௌரி சௌரா வன்முறை நிகழ்வினால் இவ்இயக்கம் வாபஸ் பெறப்பட்டது.

1928 & 1929 - பூர்ண சுயராஜ்ஜியம் - சைமன் குழுவின் வருகைக்கு எதிர்ப்பு கிளம்பிய நிலையில், 1929 லாகூர் மாநாட்டில் "பூர்ண சுயராஜ்ஜியம்" (முழுமையான சுதந்திரம்) என்பதே இந்தியாவின் ஒரே இலக்கு என்று பிரகடனப்படுத்தப்பட்டது.

1930 & 1931 - உப்புச் சத்தியாகிரகம் - ஆங்கிலேயர்களின் உப்பு வரியை எதிர்த்து காந்தியடிகள் மேற்கொண்ட தண்டி யாத்திரை (உப்புச் சத்தியாகிரகம்) உலக அளவில் கவனத்தைப் பெற்றது. 1931-ல் காந்தி - இர்வின் ஒப்பந்தம் கையெழுத்தான அதே வேளையில், புரட்சியாளர் பகத்சிங் தூக்கிலிடப்பட்டார்.

1935 & 1942 - வெள்ளையனே வெளியேறு - 1935 இந்திய அரசுச் சட்டத்திற்குப் பிறகு, இரண்டாம் உலகப் போரின் சூழலில் 1942-ல் கிரிப்ஸ் தூதுக்குழுவின் தோல்வியைத் தொடர்ந்து, காந்தியடிகள் "செய் அல்லது செத்து மடி" என்ற முழக்கத்துடன் வெள்ளையனே வெளியேறு இயக்கத்தைத் தொடங்கினார்.

1946 & 1947 - சுதந்திர உதயம் - 1946-ல் அமைச்சரவைத் தூதுக் குழுவின் வருகையைத் தொடர்ந்து, அதிகாரப் பகிர்வுக்கான பேச்சுவார்த்தைகள் முடிவடைந்து, 1947 ஆம் ஆண்டு ஆகஸ்ட் 15 நள்ளிரவில் இந்தியா பிரிட்டிஷாரிடமிருந்து முழுமையான விடுதலை பெற்றது.

இன்றைய சுதந்திரக் காற்றை நாம் சுவாசிப்பதற்குப் பின்னால் லட்சக்கணக்கான தியாகிகளின் ரத்தமும் வேர்வையும் அடங்கியுள்ளன. அகிம்சை, புரட்சி, மக்கள் சக்தி என்ற முக்கோணப் பாதையில் பயணித்து அடைந்த இந்த விடுதலையைப் பேணிப் பாதுகாப்பதும், நாட்டின் ஒற்றுமையைக் காப்பதும் ஒவ்வொரு இந்தியனின் தலையாய கடமையாகும்.