- தமிழ்மாணி எழுத்தாளர் இரா. கலைச்செல்வி 

சிவகங்கையின் வேப்பமரக் காற்றும், செம்மண் தூசியும் நிறைந்த அந்தச் சிறிய கிராமத்தில், சொக்கநாதனின் ஓட்டுக் கூரை வீடுதான் இந்துபிரியாவின் உலகம். 

அப்பா ஒரு சாதாரண பஞ்சாயத்து எழுத்தர்; அம்மா தையல் வேலை செய்பவர். பிறந்து வளர்ந்த சூழல் எளிமையானது என்றாலும், இந்துபிரியாவின் மனதுக்குள் சிறு வயது முதலே ஒரு பெரும் தீ எரிந்து கொண்டிருந்தது. அது அதிகாரத்தைக் கைப்பற்றுவதற்கான ஆசையல்ல; ஊர் மக்களின் கண்ணீரைத் துடைப்பதற்கான தேடல்.

சட்டம் படித்து முடித்து, ஊரில் நடக்கும் சிறு சிறு பிரச்சனைகளுக்குப் பஞ்சாயத்து பேசத் தொடங்கியபோதே ஊர்க்காரர்களின் பார்வையில் அவள் வெறும் "சொக்கநாதனின் மகள்" என்பதில் இருந்து "நம்ம வீட்டுப் பொண்ணு" ஆக மாறினாள்.

ஒருநாள் மாலை, வழக்கம்போல தெருமுனைத் திண்ணையில் அமர்ந்து மக்களிடம் பேசிக் கொண்டிருந்தபோது, பக்கத்து ஊர் முதியவர் சுப்பையா தாத்தா மெதுவாக நடந்து வந்தார்.

"இந்துப்பிரியா தாயி... நம்ம சீமைக்கு ஒரு மருத்துவமனை கேட்டு பத்து வருஷமா மனு குடுத்துட்டே இருக்கோம். ஆனா, எந்த அதிகாரி வந்தாலும், எந்த அரசியல்வாதி ஜெயிச்சாலும் ஒன்னும் நடக்கல. ஏழை பாழைங்க அவசரத்துக்கு நாற்பது கிலோமீட்டர் ஓட வேண்டியிருக்கு. இதையெல்லாம் மாத்த உன்னைப் போன்ற பொண்ணுங்கதானே அரசியலுக்கு வரணும்?" என்று விரக்தியும் நம்பிக்கையும் கலந்த குரலில் சொன்னார்.

அந்த வார்த்தை தான் இந்துப்பிரியாவின் வாழ்க்கையை மாற்றிய திருப்புமுனை. தேர்தல் தேதி அறிவிக்கப்பட்டதும், சுயேச்சையாக போட்டியிட முடிவெடுத்தாள் இந்துப்பிரியா. அவளிடம் ஆடம்பரப் பிரச்சாரத்திற்குப் பணமில்லை; பின்னணியில் எந்தப் பெரிய கட்சியும் இல்லை. ஆனால், அவளிடம் இருந்தது ஒன்றே ஒன்றுதான்—மக்கள் வைத்திருந்த ஆழ்ந்த நம்பிக்கை. 

"நான் உங்களுக்குப் பொய்யான வாக்குறுதிகளைத் தரமாட்டேன். ஆனா, இந்தச் சிவகங்கை சீமைக்காரியின் நேர்மைக்கு வாக்களியுங்கள். உங்கள்  பிரச்சனைகளை தீர்த்து வைக்க , என் அலுவலகக் கதவு உங்களுக்காக எப்போதும்  திறந்துதான் இருக்கும்!" என்று அவள் தெருத் தெருவாகச் சென்று பேசினாள்.

வாக்கு எண்ணும் நாள். எதிரே நின்ற பெரும் தலைவர்களின் பண பலத்தையும், அதிகாரத்தையும் தவிடுபொடியாக்கி, சிவகங்கைப் தொகுதி சட்டமன்ற உறுப்பினராக (எம்.எல்.ஏ) வெற்றி பெற்றாள் இந்துப்பிரியா! 

சிவகங்கை வரலாற்றிலேயே ஒரு சாதாரணக் குடும்பத்துப் பெண் சட்டமன்றம் செல்வது அதுவே முதல் முறை. வெற்றி பெற்ற மறுநாளே இந்துப்பிரியாவின் நடவடிக்கை அனைவருக்கும் ஆச்சரியத்தை அளித்தது. ஊர்வலங்கள் இல்லை, பிரம்மாண்டக் கொண்டாட்டங்கள் இல்லை. சட்டப்பேரவை உறுப்பினராகப் பொறுப்பேற்ற அடுத்த வாரமே, தொகுதி மக்களுக்காகச் சிறப்பு முகாம் ஒன்றை அமைத்தாள்.

முதலாவதாக, சிவகங்கையின் நீண்ட நாள் கோரிக்கையான நவீன வசதிகளுடன் கூடிய அரசு மருத்துவமனைக்கான  கோரிக்கை மனு  தயாரித்து, நேராக சுகாதாரத் துறை அமைச்சரைச் சந்தித்துப் பேசினாள். சிவகங்கைப் பெண்களின் வாழ்வாதாரத்தை உயர்த்த குடிசைத் தொழில்களுக்கான சிறப்புக் கடன் உதவித் திட்டங்களை தொகுதிக்குள் கொண்டு வந்தாள்.

ஒவ்வொரு வாரமும் சனிக்கிழமை தோறும், "மக்களுடன் எம்.எல்.ஏ" என்ற முறையைத் தொடங்கி, எந்தத் தடையும் இன்றி எளிய மக்கள் அவளை நேரடியாகச் சந்திக்கும் சூழலை உருவாக்கினாள். முதியோர் உதவித்தொகை, குடிநீர் வசதி, மாணவர்களுக்கான கல்வி உதவி எனப் பிரச்சனைகள் ஒவ்வொன்றாகத் தீர்க்கப்பட்டன.

ஒருமுறை நள்ளிரவில் சிவகங்கையில் பெய்த கனமழையில், தாழ்வான பகுதியில் அமைந்திருந்த குடிசைகள் வெள்ளத்தில் மூழ்கின. செய்தி அறிந்த சில நிமிடங்களிலேயே, எந்த அதிகாரிகளின் வருகைக்காகவும் காத்திருக்காமல், ஒரு சாதாரண மழைக்கோட்டை மாட்டிக்கொண்டு வெள்ளத்தில் இறங்கினாள் இந்துப்பிரியா. 

முழங்கால் தண்ணீரில் நின்று, மீட்புக் குழுவினருடன் சேர்ந்து மக்களைப் பாதுகாப்பான இடத்திற்கு அனுப்பி வைத்தாள்.

அப்போது, அவளைத் திகைப்போடு பார்த்த சுப்பையா தாத்தா கண்ணீருடன் சொன்னார், "தாயி... நாங்க உனக்கு ஓட்டு போட்டது உன்னை ஜெயிக்க வைக்கிறதுக்கு மட்டும் இல்லைம்மா... எங்களை வாழ வைக்கிறதுக்கும் தான்.  இன்னைக்கு நிருபிச்சிட்ட தாயி. நீ நல்லா இருக்கணும்!" என மனதார வாழ்த்தினார்.

இந்துப்பிரியா புன்னகையுடன் சொன்னாள், "தாத்தா, நான்  உங்க பொண்ணு. சிவகங்கைச் சீமையோட மண்ணும், மக்கள் மனசும் எனக்கு நல்லாவே தெரியும். எனக்கு வாக்களிச்ச ஒவ்வொரு வாக்காளரும் என் குடும்பம். அவங்களுக்காக உழைக்கிறதுதான் இந்தச் சீமைக்காரிக்குக் கிடைச்ச மிகப்பெரிய  வரம்!" என்றாள். 

அன்று சிவகங்கை சீமை ஒரு புதிய எம்.எல்.ஏவை மட்டும் பார்க்கவில்லை; ஊரின் உண்மையான காவலாளியைக் கண்டு  பெருமிதம் கொண்டது.

(சிவகங்கையைச் சேர்ந்த  எழுத்தாளர் இரா.  கலைச்செல்வி, தமிழ்நாடு அரசின் தலைமை செயலகத்தில் பல்வேறு துறைகளில் பணியாற்றி ஓய்வு பெற்ற உயர் அரசு அதிகாரி ஆவார் . அவரின் கணவர் மத்திய அரசில் பணியாற்றி ஓய்வு பெற்ற தலைமை விஞ்ஞானி. எழுத்தின் மீதும் , வாசிப்பின் மீதும், தீராக்  காதல் கொண்ட அவர்,  நீண்ட  காலமாக  எழுதி வருகிறார். அகில இந்திய வானொலியில் இவரது பல கதைகள் ஒளிபரப்பாகி உள்ளன. கதைகளைத் தவிர,  கவிதைகளும், ஆய்வு கட்டுரைகளையும் அதிகம் எழுதி வரும் இவர் உளவியலில் முதுகலை பட்டமும் பெற்றவர். சாதனைச் செல்வி, சாதனைப் பெண், தமிழ் மாமணி, தங்கத்தாரகை,  சேவா ரத்னா , கவிஞாயிறு,  கவியருவி, கவிச்செம்மல்,  உழைப்பாளர் திலகம், மகாகவி, செம்மொழி கலைஞர் விருது, கலைரத்னா ‌ போன்ற 30 ‌க்கும் மேற்பட்ட  விருதுகளையும் அவர்  பெற்றுள்ளார்)