மதுரை: இந்திய ரயில்வேத் துறை, பயணிகளின் வசதிக்காகவும் சுற்றுலாவை மேம்படுத்துவதற்காகவும் பல்வேறு நவீன மாற்றங்களைச் செய்து வருகிறது. 

அந்த வகையில், இயற்கையின் எழில் கொஞ்சும் காட்சிகளை ரயில் பயணத்தின்போதே ரசித்து மகிழும் வகையில் அறிமுகப்படுத்தப்பட்ட நவீன சொகுசுப் பெட்டிதான் விஸ்டாடோம் கண்ணாடி ரயில் பெட்டியாகும். 

தென்னக ரயில்வேயில், மதுரை மற்றும் கேரளாவின் புனிதத் தலமான குருவாயூர் இடையே இயங்கும் மதுரை – குருவாயூர் எக்ஸ்பிரஸ் (வண்டி எண்: 16327 / 16328) ரயிலில் இணைக்கப்பட்டுள்ள இந்த விஸ்டாடோம் பெட்டி, பயணிகளிடையே பெரும் வரவேற்பைப் பெற்றுள்ளது.

மதுரையில் தொடங்கி, திருநெல்வேலி, தென்காசி, செங்கோட்டை வழியாகக் கொல்லம் மற்றும் குருவாயூரை அடையும் இந்த ரயில் பாதை, மேற்குத் தொடர்ச்சி மலையின் அழகிய வனப்பகுதிகள், பசுமையான வயல்வெளிகள், நீர்வீழ்ச்சிகள், உயரமான பாலங்கள் மற்றும் குகைகள் வழியாகச் செல்கிறது. குறிப்பாக, செங்கோட்டை - புனலூர் இடைப்பட்ட ரயில் பாதை இயற்கை எழில் நிறைந்த புகழ்பெற்ற பகுதியாகும். இந்த இயற்கை அழகை முழுமையாகக் கண்டு இரசிக்க விஸ்டாடோம் பெட்டி மிகச்சிறந்த வாய்ப்பை வழங்குகிறது.

இந்தப் பெட்டியின் மிக முக்கியச் சிறப்பம்சம், பயணிகள் அமரும் இருக்கைகளை 360 டிகிரி கோணத்தில் சுழற்ற முடியும் என்பதாகும். ரயில் செல்லும் திசைக்கோ அல்லது ஜன்னல் வழியாக வெளியே தெரியும் இயற்கைக் காட்சிகளையோ பயணிகள் தங்கள் விருப்பத்திற்கு ஏற்ப இருக்கையைத் திருப்பி அமர்ந்து ரசிக்கலாம்.

பெட்டியின் மேற்கூரை வெளிப்படையான கண்ணாடியால் (Glass Roof) வடிவமைக்கப்பட்டுள்ளது. வழக்கமான ரயில்களை விட மிகப் பெரிய பக்கவாட்டுச் சுழல் கண்ணாடிகள் அமைக்கப்பட்டுள்ளதால், இயற்கை எழிலை முழுமையாகத் தடங்கலின்றிப் பார்க்க முடியும். சூரிய ஒளி அதிகமாக இருக்கும் நேரங்களில் கண்ணாடியை மறைக்க மின்சாரக் கட்டுப்பாட்டு திரைச்சீலைகளும் உள்ளன.

பெட்டியின் ஒரு முனையில் 'அப்சர்வேஷன் லவுஞ்ச்' அமைக்கப்பட்டுள்ளது. பயணிகள் அங்கு சென்று நின்று கொண்டு, ரயில் கடந்து செல்லும் பாதையையும் அழகிய இயற்கைக் காட்சிகளையும் பின்னணியாகக் கொண்டு புகைப்படங்கள் மற்றும் ஒளிப்படங்கள் எடுத்து மகிழலாம்.

முழுமையாகக் குளிரூட்டப்பட்ட வசதி கொண்டது. பயணிகள் தங்கள் கைபேசி மற்றும் மடிக்கணினிகளைச் சார்ஜ் செய்ய ஒவ்வொரு இருக்கையிலும் தனியான சார்ஜிங் பாயிண்டுகள். நவீனத் தகவல் அமைப்புகள், டிஜிட்டல் திரைகள் மற்றும் ஒலிபெருக்கிகள். மாற்றுத்திறனாளிகள் எளிதாகப் பயன்படுத்தும் வகையில் பரந்த கதவுகள் மற்றும் நவீனத் தானியங்கி பயோ-டாய்லெட்டுகள். பாதுகாப்புக்காகச் சுழல் கேமராக்கள் (CCTV) மற்றும் தீயணைப்புக் கருவிகள் பொருத்தப்பட்டுள்ளன.

மதுரை மீனாட்சி அம்மன் கோவில், தென்காசி குற்றாலம், கேரளாவின் கொல்லம் மற்றும் குருவாயூர் கோவில் என ஆன்மீக மற்றும் சுற்றுலாத் தலங்களை இணைக்கும் இந்தப் பாதையில், விஸ்டாடோம் பெட்டி சேர்க்கப்பட்டிருப்பது சுற்றுலாத் துறையை பெரிதும் ஊக்குவித்துள்ளது. உள்நாட்டு மற்றும் வெளிநாட்டுச் சுற்றுலாப் பயணிகள் இந்தப் பயணத்தை ஒரு மறக்க முடியாத அனுபவமாகக் கருதுகின்றனர்.

ரயில் பயணம் என்பது வெறும் ஒரு இடத்திலிருந்து மற்றொரு இடத்திற்குச் செல்வது மட்டுமல்ல; அது ஒரு இனிமையான அனுபவம் என்பதை மதுரை – குருவாயூர் எக்ஸ்பிரஸின் விஸ்டாடோம் பெட்டி மெய்ப்பிக்கிறது. இயற்கை விரும்பிகளுக்கும், புகைப்படக் கலைஞர்களுக்கும், குடும்பத்தோடு பயணிப்போருக்கும் இந்த விஸ்டாடோம் பெட்டிப் பயணம் ஒரு வாழ்நாள் மறக்க முடியாத சொகுசு அனுபவமாக அமைகிறது.

இந்த ரயில் தொடக்க விழாவில் மதுரை எம்.பி. சு. வெங்கடேசன் உள்ளிட்டோர் கலந்து கொண்டனர். இதுகுறித்து அவர் கூறுகையில், தென்னக ரயில்வேயில் முதன்முறையாக மதுரை – குருவாயூர் எக்ஸ்பிரஸ் ரயிலில் காட்சி வடிவப் பெட்டி (விஸ்டாடோம் பெட்டி) அறிமுகம்!

இமயமலைப் பகுதியின் இயற்கை எழில் சார்ந்த கல்கா - சிம்லா (ஹிம் தர்ஷன் எக்ஸ்பிரஸ்), மேற்குத் தொடர்ச்சி மலையின் வடக்குப் பகுதியான மும்பை - மட்கான் (கோவா வழித்தடம்), கிழக்குத் தொடர்ச்சி மலைத் தொடரில் உள்ள விசாகப்பட்டினம் - அராக்கு பள்ளத்தாக்கு வழித்தடம் போன்று, மிகச்சிறப்பான இயற்கை எழில் சார்ந்த செங்கோட்டை முதல் புனலூர் வரையிலான வழித்தடத்தில் இயங்கும் ரயிலில் காட்சிப் பெட்டிகள் இணைக்கப்பட வேண்டும் என்று கடந்த மூன்று ஆண்டுகளாக தேசிய ரயில்வே ஆலோசனைக்கூட்டத்தில் தொடர்ந்து வலியுறுத்தி வந்தோம்.

அதனை ஏற்ற ரயில்வே வாரியம், சோதனை ஓட்டத்தை மூன்று மாதம் நடத்த ஏற்றுக்கொண்டு அறிவித்தது. அந்த வரலாற்றுச் சிறப்புமிக்க பயணத்தின் தொடக்க நாள் இன்று.

இன்றைய பயணத்தில் பங்கெடுத்த பயணிகளுக்கு இனிப்பு வழங்கி என் வாழ்த்துகளைத் தெரிவித்தேன். இந்த நிகழ்வில் பொறுப்பு மேயர் நாகராஜன் மற்றும் ரயில்வே துறை அதிகாரிகள் பங்கேற்றனர் என்று கூறியுள்ளார்.