சென்னை: கடந்த ஒரு வாரமாகவே தங்கம் விலை  ஏறத் துவங்கி உள்ளது அனைவரையும் கவலையில் ஆழ்த்தியுள்ளது. இன்றாவது குறையுமா? என்று பார்த்தால் ஏமாற்றம் தான் மிச்சம். ஏன்னா தங்கம் விலை இன்றும் உயர்வே.

"தங்கம் விலை கம்மி" அது.. போன மாசம்.. அப்ப இப்ப.. தாறுமாறா ஏறுது.. இதை நினைக்கும் போதே வடிவேலு காமடி தான் நினைவுக்கு வருகிறது. "அது போன மாசம் இது இந்த மாசம்"னு தங்கம் தெனாவெட்டாக கூறுவது போலத் தேன்றுகிறது. 

"விடுப்பா விடுப்பா.. புரட்டாசி வந்தா விலை குறையறதும், ஐப்பசி பிறந்தா விலை ஏறுறதும் சகஜம்தானே" என்று பெரிய கருப்பத் தேவர் காதைக் குடைஞ்சுகிட்டே சினிமாவில் பேசும் வசனமும் கூடவே வந்து நெஞ்சைக் கடைகிறது.. சரி அதை விடுங்க.. இன்னக்கி விலை என்ன தெரியுமா..!

தங்கத்தின் இன்றைய விலை நிலவரம் இதாங்க:

1 கிராம் 22 கேரட் ஆபரண தங்கத்தின் விலை 5675 ரூபாயாக உள்ளது. இது நேற்றைய விலையில் இருந்து 15 ரூபாய் அதிகரித்து சவரனுக்கு ரூ.120 அதிகரித்துள்ளது. 8 கிராம் ஆபரண தங்கத்தின் விலை 45400 ரூபாயாக உள்ளது.  1 கிராம் 24 கேரட் தங்கத்தின் விலை 6191 ரூபாயாக உள்ளது. இது நேற்றைய விலையில் இருந்து 16 ரூபாய் அதிகமாகும். 8 கிராம் 24 கேரட் தங்கத்தின் விலை ரூ.49528 ஆக உள்ளது.

தங்கம் விலை உயர்ந்துள்ள நிலையில், வெள்ளியின் விலை சற்று குறைந்து உள்ளது. நேற்றைய விலையில் இருந்து 50 காசு குறைந்து, 1 கிராம் வெள்ளி விலை ரூபாய்.74.60 காசாக உள்ளது.  8 கிராம் வெள்ளி விலை ரூபாய் 596.80 காசாக உள்ளது. 

தங்கத்தின் விலை எவ்வளவு கூடினாலும் அதன் தேவை குறைய போறது கிடையாது. என்ன தான் செய்யன்னு புலம்பிக்கிட்டே தான் நடுத்தர மக்கள் வாங்கிட்டு இருக்காங்க...  நகை கடையில எல்லாம் அவ்வளவு கூட்டம் அலைமோதுது..  தீபாவளி, நவராத்திரி, விசேசங்கள் என விழாக் காலம் என்பதால் தான் இந்த கூட்டம்னு நகை கடை உரிமையாளர்கள் கூறு வருகின்றனர்.. இப்படிக் கஷ்டப்பட்டாவது தங்கம் வாங்குவது ஏன்னா.. அது நல்ல முதலீடு என்பதால்தான்.. !