திருப்பதி : திருப்பதி ஏழுமலையான் கோயிலின் 'ஸ்ரீவாரி லட்டு' உலகப் புகழ்பெற்ற ஒரு பிரசாதமாகும். 2025-ஆம் ஆண்டில் இந்த லட்டு விற்பனை இதுவரை இல்லாத அளவாக 13.50 கோடியைத் தாண்டி புதிய வரலாற்றுச் சாதனை படைத்துள்ளது.

திருப்பதி லட்டுவின் வரலாறு சுமார் 300 ஆண்டுகளுக்கு மேலானது. கி.பி. 1480-களில் கல்வெட்டுகளில் 'மனோகரம்' என்ற இனிப்பு பிரசாதமாக வழங்கப்பட்ட குறிப்புகள் உள்ளன. இருப்பினும், தற்போதைய வடிவிலான லட்டு 1715 ஆகஸ்ட் 2-ஆம் தேதி முதல் பயன்பாட்டிற்கு வந்தது. தொடக்க காலத்தில், நீண்ட தூரம் பயணம் செய்யும் பக்தர்களுக்குப் பிரசாதம் கெட்டுப் போகாமல் இருப்பதற்காகவே லட்டு அறிமுகப்படுத்தப்பட்டது. 1940-களில் 'கல்யாணம் ஐயங்கார்' என்பவரால் லட்டு தயாரிக்கும் முறையில் சீர்திருத்தங்கள் செய்யப்பட்டு, இன்று நாம் காணும் தனித்துவமான சுவை மற்றும் வடிவம் நிலைபெற்றது. 2009-ல் இதற்கு 'புவிசார் குறியீடு' வழங்கப்பட்டது.

திருமலை திருப்பதி தேவஸ்தானம் (TTD) வெளியிட்டுள்ள புள்ளி விவரங்களின்படி, 2024-ஆம் ஆண்டில் 12.15 கோடி லட்டுகள் விற்பனையாகி இருந்தன. ஆனால், 2025-ஆம் ஆண்டில் இது சுமார் 10 சதவீத அதிகரித்து 13.52 கோடி லட்டுகளாக உயர்ந்துள்ளது. இது முந்தைய ஆண்டை விட சுமார் 1.37 கோடி அதிகமாகும். குறிப்பாக, கடந்த டிசம்பர் 27 அன்று ஒரே நாளில் மட்டும் 5.13 லட்சம் லட்டுகள் விற்பனையாகின. இது பக்தர்களின் வருகை மற்றும் லட்டு மீதான அதீத ஈர்ப்பைக் காட்டுகிறது.

லட்டு தயாரிக்கும் இடம் 'பொட்டு' (Potu) என்று அழைக்கப்படுகிறது. இங்கு தினமும் சுமார் 4 லட்சம் லட்டுகள் தயாரிக்கப்படுகின்றன. லட்டின் சுவை மாறாமல் இருக்க 'திட்டம்' (Dittam) எனப்படும் மூலப்பொருட்களின் அளவு கச்சிதமாகப் பின்பற்றப்படுகிறது. ஒரு லட்டு தயாரிக்க ஏறத்தாழ 175 கிராம் எடையுள்ள மூலப்பொருட்கள் (கடலை மாவு, நெய், சர்க்கரை, முந்திரி, திராட்சை, ஏலக்காய், கற்கண்டு) பயன்படுத்தப்படுகின்றன.

தற்போது லட்டு தயாரிப்பில் ஈடுபடும் 700-க்கும் மேற்பட்ட ஊழியர்களின் பணிச் சூழலை மேம்படுத்தவும், தரத்தை உறுதிப்படுத்த நவீன ஆய்வகங்களைப் பயன்படுத்தவும் TTD நிர்வாகம் கூடுதல் கவனம் செலுத்தி வருகிறது. இந்த நிர்வாக மாற்றங்களும், பக்தர்களின் வருகை அதிகரிப்புமே லட்டு விற்பனையில் இத்தகைய இமாலய சாதனைக்குக் காரணமாக அமைந்துள்ளது.