சென்னை : தமிழக அரசியல் களம் 2026 சட்டமன்றத் தேர்தலை நோக்கிச் சூடுபிடிக்கத் தொடங்கியுள்ள நிலையில், தமிழக வெற்றிக் கழகத்தின் (தவெக) தலைவர் நடிகர் விஜய் எந்தத் தொகுதியில் போட்டியிட போகிறார் என்ற எதிர்பார்ப்பு அதிகரித்துள்ளது. இந்நிலையில், வடசென்னைக்கு உட்பட்ட பெரம்பூர் தொகுதியில் விஜய் போட்டியிட வேண்டும் என்று அக்கட்சியின் நிர்வாகிகள் ஒருமனதாகத் தீர்மானம் நிறைவேற்றியுள்ளனர்.

தீர்மானத்தின் பின்னணி:

சமீபத்தில் சென்னையில் நடைபெற்ற தவெக நிர்வாகிகள் ஆலோசனைக் கூட்டத்தில், கட்சியின் தேர்தல் பிரச்சார மேலாண்மைச் செயலாளர் ஆதவ் அர்ஜுனா இந்தத் தீர்மானத்தைக் கொண்டு வந்தார். வடசென்னை பகுதி நீண்டகாலமாகப் போதிய வளர்ச்சியின்றிப் பின் தங்கியிருப்பதாகவும், வறுமை மற்றும் அடிப்படை வசதிகள் குறைபாடு உள்ள தொகுதியைத் தேர்ந்தெடுத்து அங்கு மாற்றத்தைக் கொண்டு வர விஜய் விரும்புவதாகவும் அவர் குறிப்பிட்டார். "பெரம்பூர் தொகுதியைச் சிங்கப்பூர் போல மாற்ற வேண்டும் என்பதே எங்கள் தலைவரின் கனவு" என்று ஆதவ் அர்ஜுனா உணர்ச்சிப்பூர்வமாகப் பேசினார்.

பெரம்பூரின் அரசியல் முக்கியத்துவம்:

தற்போது திமுகவின் வசமுள்ள பெரம்பூர் தொகுதியில் தவெக வலுவான அடித்தளத்தைக் கொண்டுள்ளது. இங்கு மட்டும் கட்சிக்கு சுமார் 40,000 உறுப்பினர்களும், 1,800-க்கும் மேற்பட்ட நிர்வாகிகளும் இருப்பதாகக் கட்சியின் பொதுச் செயலாளர் என்.ஆனந்த் தெரிவித்துள்ளார். வடசென்னையை திமுகவின் கோட்டை எனக் கூறுபவர்களுக்குப் பதிலடி கொடுக்கும் வகையில், அங்கிருந்தே தனது அரசியல் பயணத்தைத் தொடங்க விஜய் திட்டமிட்டுள்ளதாகத் தெரிகிறது.

வேலூர் நிர்வாகிகள் சந்திப்பு :

மக்கள் சந்திப்பிற்கு அதிக கட்டுப்பாடுகள் விதிக்கப்படுவதுடன், அனுமதியும் தொடர்ந்து மறுக்கப்படுவதால் இந்த கூட்டங்களை தவெக நிர்வாகிகள் சந்திப்பு கூட்டமாக விஜய் மாற்றி விட்டார். விஜய் ஒவ்வொரு மாவட்ட நிர்வாகிகளையும் சந்தித்து, பேசி வருகிறார். அந்த வகையில் கடந்த வாரம் சேலத்தில் நிர்வாகிகளை சந்தித்த விஜய், இந்த வாரம் வேலூர் மாவட்ட நிர்வாகிகளை சந்திக்க உள்ளார். கட்சியின் நிர்வாகிகள் சந்திப்பு கூட்டத்திற்கு பிறகு  விஜய் தான் போட்டியிடும் தொகுதி குறித்து இறுதி முடிவு எடுப்பார் என எதிர்பார்க்கப்படுகிறது.

தவெக சார்பில் விருப்பமனு அளிப்பதற்கான காலக்கெடு ஏற்கனவே முடிந்து விட்டது. விரைவில் 234 தொகுதிகளுக்கும் வேட்பாளர்களை தேர்வு செய்வதற்கான நேர்காணல் நடத்தப்பட உள்ளதாக சொல்லப்படுகிறது. அப்போது விஜய் போட்டியிடும் தொகுதி குறித்த அறிவிப்பும் வெளியாகும் என சொல்லப்படுகிறது. இதற்கு முன்பு வரை "வி" என்ற எழுத்தில் துவங்கும் தொகுதியில் தான் விஜய் போட்டியிட உள்ளதாக சொல்லப்பட்டது. சமீபத்தில் விருகம்பாக்கத்தில் அவர் போட்டியிட உள்ளதாகவும், திருச்சி கிழக்கு தொகுதியிலும் போட்டியிட உள்ளதாகவும் சொல்லப்பட்டது குறிப்பிடத்தக்கது.