சென்னை: 10, 11ம் வகுப்பு தேர்வு முடிவுகள் இன்று வெளியாகியுள்ள நிலையில், மாணவர்களுக்கு முதல்வர் மு.க.ஸ்டாலின் மற்றும் தவெக தலைவர் விஜய் வாழ்த்து தெரிவித்துள்ளனர்.

2024-25ம் கல்வியாண்டுக்கான 10 மற்றும் 11ம் வகுப்பு தேர்வு முடிவுகள் இன்று வெளியாகியுள்ளன. இந்த தேர்வில் பங்கேற்ற மாணவர்களுக்கு முதல்வர் மு.க.ஸ்டாலின் மற்றும் தவெக தலைவர் விஜய் வாழ்த்து தெரிவித்துள்ளனர்.

முதல்வர் மு.க.ஸ்டாலின்

இது குறித்து முதல்வர் மு.க.ஸ்டாலின் வெளியிட்ட எக்ஸ் தள பதிவில், 10 மற்றும் 11ம் வகுப்புகளில் தேர்ச்சி பெற்றுள்ள மாணவர்கள் அனைவருக்கும் வாழ்த்துகள்!

பத்தாம் வகுப்பில் தேர்ச்சி பெற்றவர்கள், உங்கள் கல்லூரி இலக்குக்குத் தேவையான பாடப்பிரிவுகளைத் தேர்ந்தெடுத்துப் படியுங்கள்! பதினோராம் வகுப்பில் தேர்ச்சி பெற்றவர்கள், இன்னும் அதிக மதிப்பெண்களைப் பெற்று பன்னிரண்டாம் வகுப்பில் தேர்ச்சி பெற வாழ்த்துகள்!

இந்த தேர்வுகளில் தேர்ச்சி பெற முடியாதவர்கள் மனம் தளர வேண்டாம். அடுத்தடுத்த தேர்வுகள் உள்ளன. அவற்றைப் பயன்படுத்திக் கொண்டு தேர்ச்சி பெறுங்கள். கல்வியை இறுகப் பற்றிக்கொண்டு முன்னேறுங்கள் என்று தெரிவித்துள்ளார்.

தவெக தலைவர் விஜய்

இது குறித்து தவெக தலைவர் விஜய் வெளியிட்ட எக்ஸ் தள பதிவில்,

10 மற்றும் 11ஆம் வகுப்பில் தேர்ச்சி பெற்றுள்ள தம்பி, தங்கைகளுக்கு எனது மனமார்ந்த பாராட்டுகளைத் தெரிவித்துக்கொள்கிறேன்.

அடுத்தடுத்த வகுப்புகளில் மேலும் நல்ல மதிப்பெண்களைப் பெறுவதற்கு, கடின உழைப்பை மீண்டும் முதலீடு ஆக்குங்கள். தன்னம்பிக்கையோடு பற்பல சாதனைகள் புரிந்து தலைசிறந்து விளங்கிடம், வாழ்வில் வெற்றி காணவும் வாழ்த்துகிறேன் என்று தெரிவித்துள்ளார்.