- ஸ்வர்ணலட்சுமி

"அம்மா கீரைம்மா.. கீரை.. சுக்கான் கீரை சுக்கான் கீரை"

என்னாது சுக்கான் கீரையா.. புதுசா இருக்கே.. !

அட, சுக்கான் கீரை புதுசு இல்லைங்க.. சூப்பரான சத்தான ஆரோக்கியமான கீரை இது. சுக்கான் கீரை கல்லீரலை பலப்படுத்தி மஞ்சள் காமாலைக்கு சிறந்த மருந்தாக பயன்படுகிறது. ரத்தத்ததை சுத்திகரிக்கிறது. இதயத்தைப் பாதுகாக்கிறது. பித்தம் தணிக்கும். ரத்த அழுத்தம் உள்ளிட்ட பிரச்சனையிலிருந்து விடுபடலாம்.

இந்தக் கீரை நல்ல புளிப்புத்தன்மை கொண்டது. கீரையிலேயே புளிப்புச் சுவை இருப்பதனால் புளி சேர்க்காமல் 10 நிமிடத்தில் சமைக்கலாம். மலச்சிக்கல் பிரச்சனைக்கு நல்ல தீர்வாக இருக்கும். மேலும் நல்ல பசியையும் தூண்டும் இந்த சுக்கான் கீரையை பற்றி ஒரு சுவையான ரெசிபி பார்க்கலாம் வாங்க.

இதை சமைக்க பத்து நிமிடமே ஆகும். எப்படி செய்யலாம் என்று பார்ப்போமா:-

தேவையான பொருட்கள்:

சுக்கான் கீரை ஒரு கட்டு

சின்ன வெங்காயம் 10

பூண்டு 10 பல்

வர மிளகாய் 3 ( தேவைக்கு ஏற்ப)

துவரம் பருப்பு+ பாசிப்பருப்பு ஒரு கப்

மஞ்சள் தூள் பெருங்காயத்தூள் 1/2 ஸ்பூன்

சீரகம் ஒரு ஸ்பூன்

தாளிக்க 1. நல்லெண்ணெய் இரண்டு ஸ்பூன் 2. கடுகு 3. உளுத்தம் பருப்பு 4. கருவேப்பிலை 5. மல்லித்தழை

உப்பு காரம் தேவைக்கு ஏற்ப சேர்க்கவும்

செய்முறை:

துவரம் பருப்பு பாசிப்பருப்பு நன்றாக கழுவி ஒரு குக்கரில் தண்ணீர் ஊற்றி மஞ்சள் பொடி ,பெருங்காயத்தூள், சீரகம் சிறிது, நல்லெண்ணெய் சேர்த்து வேக வைக்கவும் மூன்று விசில் வந்தவுடன் அடுப்பை அணைக்கவும்,.

ஒரு கடாயில் நன்றாக கழுவிய சுக்கான் கீரை, வெங்காயம் ,பூண்டு ,வர மிளகாய் போட்டு நன்றாக வதக்கவும். இந்தக் கீரை கலவையை குக்கரில் இருக்கும் பருப்பில் சேர்த்து நன்றாக கடையவும் அல்லது மிக்ஸியில் பல்ஸ் மோடில் போட்டு உப்பு போடவும்

கடாயில் நல்லெண்ணெய் ஊற்றி, இரண்டு பூண்டு சின்ன வெங்காயம் தட்டிக் கொண்டு, கடுகு, உளுத்தம் பருப்பு, சீரகம், கருவேப்பிலை, வர மிளகாய் போட்டு தாளிக்கவும்.

சுக்கான் கீரை பருப்பு சேர்த்த கலவையை ஒரு  சர்விங் பவுலில் மாற்றி மல்லித்தழை தூவவும். சூடான சாதம், ராகி களி உடன் சேர்த்து சாப்பிட அருமையான சுக்கான் கீரை பருப்பு கடையல் ரெடி. நிறைய மருத்துவ குணங்கள் நிறைந்த சுக்கான் கீரையை அடிக்கடி சாப்பிடுங்க பிரண்ட்ஸ். டேஸ்ட் அப்படி இருக்கும்.....

என்ன பிரண்ட்ஸ் சூப்பரா இருக்கா.. செஞ்சு சாப்பிட்டுப் பாருங்க.. சுப்ரீமா இருக்கும்!