மதுரை: தமிழகத்தில் சமீப காலமாக பைக் டாக்ஸிகளின் பயன்பாடு பொதுமக்களிடையே பெரும் வரவேற்பைப் பெற்று வரும் அதே வேளையில், அவை சட்டப்பூர்வமானவையா என்ற விவாதமும் தொடர்ந்து நீடித்து வருகிறது. 

இந்நிலையில், இரு சக்கர வாகனங்களை டாக்ஸி போல இயக்குவதில் தமிழக அரசின் தெளிவான நிலைப்பாடு என்ன என்று சென்னை உயர்நீதிமன்ற மதுரை கிளை கேள்வி எழுப்பியுள்ளது.

பைக் டாக்ஸி சேவைகளை வழங்கும் நிறுவனங்களை முறைப்படுத்தவும், அதற்கான சட்ட மற்றும் ஒழுங்குமுறை அமைப்பை உருவாக்கவும் கோரி நீதிமன்றத்தில் பொதுநல வழக்கு ஒன்று தொடரப்பட்டது. பைக் டாக்ஸிகள் மூலம் குறைந்த கட்டணத்தில் விரைவாக பயணிக்க முடிவதால் பொதுமக்கள், குறிப்பாக இளைஞர்கள் மற்றும் வேலைக்குச் செல்வோர் இதனைப் பெருமளவில் பயன்படுத்துகின்றனர். இருப்பினும், இதற்கான முறையான வழிகாட்டுதல்கள் மற்றும் பயணிகள் பாதுகாப்பு விதிகள் இன்னும் முழுமையாக வகுக்கப்படவில்லை என்ற குற்றச்சாட்டும் எழுந்துள்ளது.

இந்த வழக்கு இன்று விசாரணைக்கு வந்தபோது, வழக்கை விசாரித்த உயர்நீதிமன்ற கிளை நீதிபதிகள், பைக் டாக்ஸி தொடர்பாக மத்திய மற்றும் மாநில அரசுகள் தங்களது விரிவான விளக்கத்தை அளிக்க வேண்டும் என்று உத்தரவிட்டுள்ளனர்.தமிழகத்தில் இரு சக்கர வாகனங்களை டாக்ஸி போல் செயல்பட அனுமதிப்பதில் மாநில அரசின் அதிகாரப்பூர்வ நிலைப்பாடு என்ன என்பதைத் தெளிவுபடுத்த வேண்டும். பைக் டாக்ஸி வழக்கு தொடர்பாக மத்திய மற்றும் மாநில அரசுகள் உடனடியாக பதில் மனு தாக்கல் செய்ய வேண்டும் என உயர்நீதிமன்ற கிளை உத்தரவிட்டுள்ளது. 

பைக் டாக்ஸி நடத்தும் தனியார் நிறுவனங்களை முறைப்படுத்தவும், பயணிகளின் பாதுகாப்பை உறுதி செய்யவும் தேவையான சட்ட மற்றும் ஒழுங்குமுறை அமைப்பை உருவாக்கக் கோரி இந்த வழக்கு தொடரப்பட்டுள்ளது கவனிக்கத்தக்கது.

தற்போது வணிக ரீதியான பயன்பாடுகளுக்கு மஞ்சள் நிற எண் பலகை கொண்ட வாகனங்களே அனுமதிக்கப்படுகின்றன. ஆனால், பெரும்பாலான பைக் டாக்ஸிகளில் சொந்தப் பயன்பாட்டிற்கான வெள்ளை நிற எண் பலகை கொண்ட இருசக்கர வாகனங்களே பயன்படுத்தப்படுகின்றன. இதனால் ஏதேனும் விபத்து ஏற்பட்டால், பயணிகளுக்குக் காப்பீடு கிடைப்பதில் சிக்கல் உள்ளதாகக் கூறப்படுகிறது. எனவே, இந்தத் துறையை முறைப்படுத்துவது காலத்தின் கட்டாயமாக மாறியுள்ளது.

மத்திய, மாநில அரசுகள் தாக்கல் செய்யவுள்ள பதில் மனுவின் அடிப்படையில், தமிழகத்தில் பைக் டாக்ஸிகளுக்கு முறையான விதிகள் வகுக்கப்படுமா அல்லது தற்காலிகத் தடை விதிக்கப்படுமா என்பது தெரியவரும். இந்த வழக்கின் அடுத்தகட்ட நகர்வுகள், இச்சேவையை நம்பியிருக்கும் ஆயிரக்கணக்கான ஓட்டுநர்கள் மற்றும் லட்சக்கணக்கான பயணிகளின் எதிர்காலத்தைத் தீர்மானிக்கும் முக்கிய காரணியாகப் பார்க்கப்படுகிறது.