நவி மும்பை தமிழ் சங்க பொன்விழா.. விஜய் டிவி ஸ்டார்களின் இசை மழையில் நனைந்த ரசிகர்கள்!

Feb 15, 2026,09:40 PM IST

நவி மும்பை: மும்பையின் முக்கியத் தமிழ் அமைப்புகளில் ஒன்றான நவி மும்பை தமிழ் சங்கம், தனது பொன்விழா ஆண்டை (50வது ஆண்டு) இன்று மிகச் சிறப்பாகக் கொண்டாடியது.

பொன் விழாக் கொண்டாட்டத்தையொட்டி சிறப்புப் பட்டிமன்றம் பிப்ரவரி 14ம் தேதி நடைபெற்றது. பிரபல பட்டிமன்ற நடுவர் பேராசிரியர் கு. ஞானசம்பந்தன் தலைமையில் நடந்த இந்தப் பட்டிமன்றம் நகைச்சுவை மன்றமாக மாறி களை கட்டியது. பலரது கருத்துக்களையும் கவர்ந்தது.

இந்த நிலையில் இன்று 2வது நாள் நிகழ்வாக விஜய் டிவி சூப்பர் சிங்கர் நிகழ்ச்சியின் மூலம் புகழ் பெற்ற பாடகர்களின் இசை நிகழ்ச்சி நடைபெற்றது.

சங்கத்தின் 50 ஆண்டு காலப் பயணத்தைக் கொண்டாடும் விதமாக, விஜய் டிவியின் முன்னணிப் பாடகர்கள் பங்கேற்ற பிரம்மாண்ட இசை நிகழ்ச்சிக்கு ஏற்பாடு செய்யப்பட்டிருந்தது. மேடையில் தங்களின் அபாரக் குரலால் ரசிகர்களைப் பாடகர்கள் கட்டிப்போட்டனர்.

விஜய் டிவியின் சூப்பர் சிங்கர் மூலம் பிரபலமான பாடர்கள் ஜீவிதா, பிரசன்னா, அனு, ஜான் ஜெரோம், தவசீலி ஆகியோர் தனித் தனியாகவும் இணைந்தும் பல பாடல்களைப் பாடி ரசிகர்களை சிலிர்க்க வைத்தனர்.

இந்தக் குழுவினர் பழைய மற்றும் புதிய ஹிட் பாடல்களைப் பாடி, அரங்கத்தையே உற்சாகத்தில் ஆழ்த்தினர்.

நவி மும்பை மற்றும் அதன் சுற்றுவட்டாரப் பகுதிகளில் வசிக்கும் ஏராளமான தமிழ் மக்கள் இந்த விழாவில் கலந்துகொண்டனர். சங்கத்தின் பொன்விழா ஆண்டை முன்னிட்டு நடத்தப்பட்ட இந்த இசை நிகழ்ச்சி, அங்கு கூடிருந்த இசைப்பிரியர்களுக்கு ஒரு மறக்க முடியாத விருந்தாக அமைந்தது.

செய்தி + புகைப்படம்: ராஜ் முஹம்மது