டெல்லி: இந்தியா முழுவதும், வருடாந்திர பாஸ்டாக் பாஸ் முறை இன்று முதல் அமலுக்கு வந்துள்ளது. இதன் மூலம், ரூ. 3000க்கு பாஸ் எடுத்துக் கொண்டு ஒரு வருட காலத்துக்கு அதைப் பயன்படுத்த முடியும்.

சரி பாஸ்டாக் வருடாந்திர பாஸ் என்றால் என்ன?

இது கார்கள், ஜீப்கள் மற்றும் வேன்கள் போன்ற வர்த்தக ரீதியற்ற தனிப்பட்ட வாகனங்களுக்கு மட்டுமே பொருந்தும் ப்ரீபெய்ட் பாஸ் ஆகும். இது சுங்கக் கட்டணங்களுக்காக ஃபாஸ்டாக் கார்டுகளை மீண்டும் மீண்டும் ரீசார்ஜ் செய்ய வேண்டிய அவசியமின்றி, தேசிய நெடுஞ்சாலைகளில் தடையற்ற பயணத்தை அனுமதிக்க உதவும்.

இது தேசிய நெடுஞ்சாலை (NH) மற்றும் தேசிய விரைவுச்சாலை (NE) கட்டண சாவடிகளில் மட்டுமே செல்லுபடியாகும். நெடுஞ்சாலை அல்லது விரைவுச்சாலை மாநில அல்லது தனியார் நிறுவனத்தால் நிர்வகிக்கப்பட்டால், வருடாந்திர பாஸ்டாக் பாஸுடன் இலவச நுழைவைப் பெற முடியாது.

இந்த பாஸ்களைப் பெறுவதற்காக ராஜமார்க யாத்ரா (Rajmarg Yatra) என்ற செயலி உருவாக்கப்பட்டுள்ளது. அதில் இதைப் பெறலாம். இதற்கான இணைப்பை, இந்திய தேசிய நெடுஞ்சாலை ஆணையம் (NHAI) மற்றும் சாலைப் போக்குவரத்து மற்றும் நெடுஞ்சாலைகள் அமைச்சகம் (MoRTH) ஆகியவற்றின் அதிகாரப்பூர்வ வலைத்தளங்களிலும் கிடைக்கும்.

பாஸை செயல்படுத்த, உங்கள் வாகனம் மற்றும் ஃபாஸ்டாக்கை சரிபார்க்க வேண்டும். இதற்குப் பிறகு, நீங்கள் ₹3,000 செலுத்த வேண்டும். பணம் செலுத்திய இரண்டு மணிநேரத்திற்குள் இது செயல்படுத்தப்படும், அதன் பிறகு பாஸை ஒரு வருடத்திற்குப் பயன்படுத்தலாம்.

ஏற்கனவே தங்கள் வாகனங்களில் ஃபாஸ்டாக் வைத்திருப்பவர்கள் புதிய ஃபாஸ்டாக் வாங்க வேண்டியதில்லை. இந்த பாஸ் ஏற்கனவே உள்ள ஃபாஸ்டாக்கில் செயல்படுத்தப்படும். இருப்பினும், வருடாந்திர பாஸைப் பெற, ஃபாஸ்டாக்கின் KYC (அடையாள சரிபார்ப்பு) அவசியம்.

வருடாந்திர பாஸானது, ஒரு வருடத்திற்கு அல்லது 200 பயணங்களுக்கு செல்லுபடியாகும். ஒரு வருடம் அல்லது 200 பயணங்கள் முடிந்த பிறகு, அது வழக்கமான பாஸ்டாக் ஆக செயல்படத் தொடங்கும். 

டெல்லி-மும்பை விரைவுச்சாலை போன்ற மூடப்பட்ட சுங்கச்சாவடி நெடுஞ்சாலைகளில் - வெளியேறும் இடங்களில் மட்டுமே சுங்கக் கட்டணம் வசூலிக்கப்படும் - ஒரு பயணத்தில் நுழைவு மற்றும் வெளியேறும் இடங்கள் இரண்டும் அடங்கும். அதேசமயம், டெல்லி-சண்டிகர் போன்ற திறந்த சுங்கச்சாவடி வழிகளில், ஒவ்வொரு சுங்கச்சாவடியைக் கடப்பதும் ஒரு தனிப் பயணமாகக் கருதப்படும்.

உங்கள் ஃபாஸ்டாக் சேசிஸ் எண்ணைப் பயன்படுத்தி பதிவு செய்யப்பட்டிருந்தால், நீங்கள் பாஸைப் பெற முடியாது. இதற்கு, நீங்கள் வாகனப் பதிவு எண்ணை (VRN) புதுப்பிக்க வேண்டும். மேலும், செல்போன் எண்ணும் புதுப்பிக்கப்பட வேண்டும்.

இன்னொரு முக்கியமான விஷயம், இந்த வருடாந்திர பாஸ்டாக் பாஸ் வாங்குவது கட்டாயமல்ல. உங்களுக்கு தேவை என்றால் வாங்கிக் கொள்ளலாம்.