துபாய்: வளைகுடா நாடுகளில் நிலவி வரும் அசாதாரணமான போர்ப் பதற்றம் காரணமாக, ஆப்கானிஸ்தான் மற்றும் இலங்கை அணிகளுக்கு இடையே துபாயில் நடைபெறவிருந்த டி20 கிரிக்கெட் தொடர் காலவரையறையின்றி ஒத்திவைக்கப்படுவதாக அறிவிக்கப்பட்டுள்ளது.

ஆப்கானிஸ்தான் மற்றும் இலங்கை கிரிக்கெட் அணிகள் மோதும் டி20 தொடர் ஐக்கிய அரபு அமீரகத்தில் நடைபெற திட்டமிடப்பட்டிருந்தது. நாளை (மார்ச் 13, 2026) இந்தத் தொடரின் முதல் போட்டி தொடங்கவிருந்த நிலையில், தற்போது ஏற்பட்டுள்ள சர்வதேச அரசியல் சூழல் காரணமாக இந்தப் போட்டிகள் ரத்து செய்யப்பட்டுள்ளன.மத்திய கிழக்கு நாடுகளில், குறிப்பாக வளைகுடா பிராந்தியத்தில் நிலவும் போர்ச் சூழலே இந்த முடிவுக்கு முக்கியக் காரணமாகக் கூறப்படுகிறது.

வளைகுடா நாடுகள் மீது ஈரான் தொடர்ந்து தாக்குதல்களை நடத்தி வருவதால், அந்தப் பிராந்தியத்தில் பாதுகாப்பு குறித்த அச்சம் அதிகரித்துள்ளது. வீரர்களின் பாதுகாப்பு மற்றும் மைதானத்திற்கு வரும் ரசிகர்களின் பாதுகாப்பை உறுதி செய்ய முடியாத சூழல் நிலவுவதால், கிரிக்கெட் வாரியங்கள் இந்த இக்கட்டான முடிவை எடுத்துள்ளன. போர்ச் சூழலால் வான்வெளிப் போக்குவரத்து பாதிக்கப்படக்கூடும் என்பதும் இந்த ஒத்திவைப்பிற்கு ஒரு மறைமுகக் காரணமாகப் பார்க்கப்படுகிறது.

ரசிகர்கள் ஏமாற்றம் :

ஆப்கானிஸ்தான் மற்றும் இலங்கை ஆகிய இரு அணிகளுமே டி20 போட்டிகளில் அதிரடி காட்டக் கூடியவை என்பதால், இந்தத் தொடர் மீது மிகுந்த எதிர்பார்ப்பு நிலவியது. ஐக்கிய அரபு அமீரகத்தில் வாழும் இரு நாட்டு ரசிகர்களும் இதற்கான டிக்கெட்டுகளை ஆர்வத்துடன் முன்பதிவு செய்திருந்தனர். தற்போது நிலவும் போர் பதற்றம் விளையாட்டுத் துறையிலும் இத்தகைய பாதிப்பை ஏற்படுத்தியிருப்பது ரசிகர்களிடையே பெரும் ஏமாற்றத்தை ஏற்படுத்தியுள்ளது.

அடுத்த கட்டம் என்ன?

இந்தப் போட்டிகள் எப்போது மீண்டும் நடத்தப்படும் என்பது குறித்து அதிகாரப்பூர்வ அறிவிப்புகள் ஏதும் இதுவரை வெளியாகவில்லை. வளைகுடா பகுதியில் அமைதி திரும்பிய பிறகு, இரு நாட்டு கிரிக்கெட் வாரியங்களும் ஆலோசித்து புதிய தேதிகளை அறிவிக்கும் என்று எதிர்பார்க்கப்படுகிறது. தற்போது வீரர்கள் மற்றும் பயிற்சியாளர்கள் பாதுகாப்பான இடங்களுக்கு மாற்றப்பட்டுள்ளதாகத் தெரிகிறது. சர்வதேச கிரிக்கெட் கவுன்சில் (ICC) இந்தப் பிராந்தியத்தில் உள்ள நிலவரத்தை உன்னிப்பாக கவனித்து வருகிறது.