புதுடெல்லி:இந்தியத் தலைமை தேர்தல் ஆணையர் ஞானேஷ் குமார் பதவி விலக வலியுறுத்தி நாடு முழுவதும் எதிர்ப்புகளும் போராட்டங்களும் தீவிரமடைந்து வரும் நிலையில், அவரது பாதுகாப்பைப் பலமடங்கு அதிகரிக்க மத்திய உள்துறை அமைச்சகம் உத்தரவிட்டுள்ளது.   

தீவிரமடையும் போராட்டங்கள்:

கடந்த சில நாட்களாக நாட்டின் பல்வேறு பகுதிகளில் தலைமை தேர்தல் ஆணையரின் செயல்பாடுகளுக்கு எதிர்ப்பு தெரிவித்தும், அவர் உடனடியாகப் தனது பதவியை ராஜினாமா செய்யக் கோரியும் அரசியல் கட்சிகள் மற்றும் பல்வேறு அமைப்புகள் சார்பில் தீவிரப் போராட்டங்கள் நடத்தப்பட்டு வருகின்றன. நாளுக்கு நாள் இந்தப் போராட்டங்களின் வீரியம் வலுத்து வருவதால், பாதுகாப்புச் சூழலைக் கருத்தில் கொண்டு மத்திய அரசு முன்னெச்சரிக்கை நடவடிக்கைகளை மேற்கொண்டுள்ளது.   

கூடுதல் பாதுகாப்புப் பிரிவு:

தலைமை தேர்தல் ஆணையர் ஞானேஷ் குமாருக்கு ஏற்கனவே உயரிய பாதுகாப்பான ‘Z+’ (இசட் பிளஸ்) பிரிவு பாதுகாப்பு வழங்கப்பட்டு வருகிறது. இருப்பினும், தற்போதைய சூழல் மற்றும் தீவிரமடைந்துள்ள போராட்டங்களைக் கணக்கில் கொண்டு, ‘Z+’ பாதுகாப்பையும் தாண்டி மேலும் கூடுதலான பலத்த பாதுகாப்பை உடனடியாக வழங்க மத்திய உள்துறை அமைச்சகம் அதிரடி உத்தரவு பிறப்பித்துள்ளது.   

வீடு மற்றும் அலுவலகங்களில் பாதுகாப்பு:

உள்துறை அமைச்சகத்தின் புதிய உத்தரவின்படி, டெல்லியில் உள்ள அவரது அரசுப் பயன்பாட்டு அலுவலகம் மற்றும் அதிகாரப்பூர்வ குடியிருப்பு ஆகிய இடங்களில் மத்திய ஆயுதப் படைப் பிரிவைச் சேர்ந்த கூடுதல் பாதுகாப்புப் படையினர் குவிக்கப்பட்டு வருகின்றன.அவரது வீட்டைச் சுற்றிலும் கூடுதல் காவலர்கள் மற்றும் சிறப்புப் பாதுகாப்புப் படையினர் 24 மணி நேரமும் சுழற்சி முறையில் தீவிர கண்காணிப்புப் பணியில் ஈடுபடுத்தப்பட்டுள்ளனர்.   தலைமை தேர்தல் ஆணையர் அலுவலகத்திற்கு வரும் பார்வையாளர்கள் மற்றும் வாகனங்கள் தீவிர சோதனைகளுக்குப் பிறகே அனுமதிக்கப்படுகின்றன.   

பயணப் பாதுகாப்பு: 

அவர் வெளியூர்கள் மற்றும் பல்வேறு நிகழ்ச்சிகளுக்குப் பயணம் செய்யும் போது, அவரது வாகன அணிவகுப்புடன் கூடுதல் துப்பாக்கி ஏந்திய பாதுகாப்பு வாகனங்களும் உடன் செல்ல ஏற்பாடு செய்யப்பட்டுள்ளது. போராட்டங்கள் தீவிரமடைந்துள்ள நிலையில், அசம்பாவிதங்கள் எதுவும் நடைபெறாமல் தடுப்பதற்கும், நாட்டின் முக்கியப் பொறுப்பில் உள்ள உயர் அதிகாரியின் பாதுகாப்பை உறுதி செய்வதற்கும் மத்திய அரசு இந்த அவசர நடவடிக்கையை எடுத்துள்ளது.