இந்தியாவுக்காக தொடர்ந்து போராடுவேன்.. எதற்கும் தயார்.. ராகுல் காந்தி ஆவேசம்

Mar 25, 2023,11:49 AM IST

சென்னை: இந்தியாவின் குரலுக்காக தொடர்ந்து போராடுவேன்.. அதற்காக என்ன விலை கொடுக்க நேர்ந்தாலும் அதற்கும் நான் தயார்தான் என்று கூறியுள்ளார் ராகுல் காந்தி.

காங்கிரஸ் இளம் தலைவர் ராகுல்காந்தி வயநாடு எம்.பி. பதவியிலிருந்து தகுதி நீக்கம் செய்யப்பட்டிருப்பது நாடு முழுவதும் பரபரப்பை ஏற்படுத்தியுள்ளது. அவர் மீதான வழக்கின் தீர்ப்பு வெளியான அடுத்த நாளே அவரது எம்.பி. பதவி பறிக்கப்பட்டிருப்பது காங்கிரஸாரை கொந்தளிக்க வைத்துள்ளது.

ராகுல் காந்திக்கு ஆதரவாகவும், ஜனநாயகத்தைக் காப்போம் என்ற பெயரிலும் தேசிய அளவில் இயக்கத்தை நடத்த காங்கிரஸ் தலைமை முடிவு செய்துள்ளது. அனைத்து எதிர்க்கட்சிகளையும் இதில் இணைத்து பிரமாண்டமான அளவில் இதை நடத்தவும் காங்கிரஸ் தீர்மானித்துள்ளது.

இந்த நிலையில் தனது தகுதி நீக்கம் குறித்து நேற்று இரவு டிவீட் ஒன்றைப்போட்டுள்ளார் ராகுல் காந்தி. அதில், நான் இந்தியாவின் குரலுக்காக போராடிக் கொண்டிருக்கிறேன். இதற்கு எந்த விலை கொடுக்கவும் நான் தயார் என்று கூறியுள்ளார் ராகுல் காந்தி.

ராகுல் காந்தி வழக்கில் உயர்நீதிமன்றத்தில் அப்பீல் செய்ய காங்கிரஸ் கட்சி தயாராகி வருகிறது. இந்த வழக்கில் அவர் மீதான தண்டனை ரத்து செய்யப்பட்டால் மட்டுமே ராகுல் காந்தியின் எம்.பி பதவி மீண்டும் கிடைக்கும் என்பதால் பெரும் எதிர்பார்ப்பு நிலவுகிறது.